I tū a Dean Gardner ki mua i te Kōti ā Rohe o Kaitaia i te rangi nei nā runga i ngā whakapae tekau mo te raweke i tētahi kotiro i raro iho i te tau tekau ma rua tau. Koia tera i noho puta noa i te noho katoa me te wiriwiri mārika.
Ka tū ano ia ki te Kōti hei te tuawaru o Poutu-te-Rangi, engari Ehara anake tenei i te kēhi pēnei na kua kitea ki te Kōti o Kaitaia i tenei wiki. E rua ra ki muri, ka tau mai tētahi atu tāne na runga i ngā whakapae koere mō tētahi taitamāhine.
I tenei wiki hoki, ko George Hayward Murray Cherrington he rua tekau ma whitu tau te pakeke, i whakawākina mō ngā whakapae e rima mō te pāwhera i tetahi kotiro mai i ngā tau tekau ma rua ki te tekau ma ono, e toru mo te pāwhera i tētahi tamāhine pakeke ake i te tekau ma ono tau, te hiahia kia ekea tētahi kotiro kei waenga i ngā tau tekau ma rua ki te tekau ma ono. Tētahi mo te moe tahi me tētahi kotiro tekau ma rua ki te tekau ma ono, e waru hoki ngā whakapae mo te akiaki kia ekea. I te tau rua mano ma rima i kitea te mata o Cherrington i te hotaka ‘Charm School’.
I ngā marama tata nei, i tu mai he tāne ano mo ngā hāmene penei na. Ko Eric Reid tera he ono tekau ma toru te pakeke, he mema Hāhi ano hoki ia, i whakaae ki ngā hāmene rua tekau ma rima e hāngai ana ki te hanga rīpene mo te tinana, e rua tekau ma whā hoki mo te mau i aua momo ripene.
Ko Daniel Taylor, he toru tekau ma whitu tau e whakawāhina ana mō ngā whakapae hara tekau ma iwa mo te raweke tamaiti i raro i ngā tau tekau ma rua, tekau ma rua ki te tekau ma ono tau, me te hunga pakeke ake i te tekau ma ono tau.
Kā mutu ko James Parker, te tumuaki tuarua o te kura o Pamapuria i te tonga o Kaitaia i whakaae ki ngā whakapae wha tekau ma iwa mo te raweke tamaiti. E rua tekau ma toru ano ngā whakapae hāmene kua ūhia atu, a, ka tu a Parker ki mua i te koti i tenei tau.
E mea ana ētahi o ngā mema o te hapori he momo mauiui tenei e ngau ana i te taone nei, a e ngana ana ngā rōpu hapori kia puta ki te ora.
Ka tū mai ano a Cherrington ki mua i te Kōti a rohe a te rua tekau ma rua o Pēpuere, ko Gardner tera ka puta mai a te tuawaru o Poutu-te-rangi.
Kairīpoata: Harata Brown.