Ka hura te moana uha, ka hura te moana kore.
Ka toto ngā tai o Paraparaumu i te parāoa nei, ko hou tina, ko hou taiki te ripia e Te Papa Atawhai mō ōna reikura.
Whakahotu nuku, whakahotu rangi, he ripo, he ripo hau.
He taketake, he huru manu, te moana i rohia.
E meatia ana, i mate kau noa te parāoa pūru nei i te moana i mua i tana paenga ki uta i te ata hāpara o te Rāapa.
Ko te whakapae, ko te tipua koroua rawa tēnei kua pae ki konei, he 15 mita te roa, he 40 tana te nui, kei te takiwā o te 60 tau te pakeke.
He paenga rangatira.
He rite ki ngā tohorā katoa kua pae ki uta i tēnei takiwā, kua whakaingoatia te parāoa nei e te hau kāinga, arā ko Te Uruhi.
Haramai ana me te ngaru nui, tuaina ki te toki.
He onepū, ki te onepū, he rehutai ki te rehu tai. Ko ngā toenga o Te Uruhi i nehua inanahi nei ki tētahi wāhi whakatetonga i te tātahi nei, kua whakarāhuitia, ko te hauora o te tangata te take.
Kairīpoata: Piripi Taylor