I tēra wiki e whakapāetia ana i werohia e tētahi mema kenge i tētahi atu, mea rawa ake i rongohia e ētahi ki ngā pū e pako ana. I tera wiki e toru ngā waka i kainga e te ahi, ki ngā whakapae nā tētahi o ngā kēnge i tahuna.
E karangirangi ana te noho a te wā kainga o Moerewa i te pupunga ake o te riri ki āna huarahi. Ko tā tētahi o ngā mema o taua hapori a Peeni Henare “e mataku pai ana ngā whānau ki roto i tenei wāhi ki te hikoi ki runga i ngā tiriti kua kite mātou i ngā pahikara nui rawa atu”.
Nona tata nei, ka kainga ngā waka e toru e te ahi, a, i tēra wiki hoki i okaina tētahi, i rongohia hoki te pahū o te pū. Ko te korero kua puta ki ngā taringa o Te Kāea e mea ana, he totohe tenei i wāenganui ake i te Kēnge Rebels.
Ko tā Henare i puhia e rātou tētahi, a e haerere tonu ana ngā kēnge ki runga i ngā tiriti, kore kore ka tino āwanagawanga ngā whanau ki roto i te tāone.
Ko te karapū Rebel MC i ahu mai i Ahitereiria. I nga tau e rua ki muri i whakapāhotia e te Ope Pirihimana o Aotearoa he tūpato ki te motu , i te anga atu ngā Rebels ki te whakatu wāhanga hou ki Aotearoa.
Ko tā te Ope Pirihimana, e rangahau ana rātou i ngā raru e toru, me te okaina i puta i te Ramere. Kua piki ake te nui o ngā nama a te hunga Pirihimana ki roto o Moerewa ki te tekau mā wha ka pera tonu te tokomaha tae noa atu ki te wā ka tau no tenei raru.
Kua mauheretia e ngā Pirihimana ngā mema tokowha o ngā Rebels engari kihai i whāki mai he aha ngā hāmene.
Ko tā tētahi wahine i korero mai kia mātou, i ngā haora katoa o te pō me te rā ka rongo te tāone i ngā mema kēnge e eke paihikara ana i runga i ngā tiriti, tu ātu kua kitea e ia i nga pokepoke pū ki runga i tana whare, he whakāturanga tera o ngā ahuatanga kei te pā ki ngā whānau o reira.
E rapu rongoa ana te hapori kia kaupare ake i ngā haukino o te wā, ko tā Henare ano “ ko te hiahia kia noho tahi, kia korero tahi, me pehea tātou e anga whakamua. Ko te tino hiahia kia whakawātea i ngā tiriti i ngā mahi nanakia a ngā kēnge, kia pai ai te tupu i ngā tamariki”.
Hei te pō o te Taite ka hui tahi te hapori o Moerewa ki te kimi huarahi ka tāea te whakatau i ēnei raru nui.