Ko tā ngā iwi e toru o ngā iwi mana whenua e whā o Te Oneroa, kīhai rātou i whakamōhiotia, ahakoa te tikanga me whai wāhi rātou ki ēnei momo whiringa i raro i tētahi kawenata whakāetanga me te Kaunihera.
E hiahia ana ngā kaihautu o Top Gear, nō te hongere o BBC ki te raki, kia whakāhuahia, pake pai, te haere o nga motuka horo rawa atu ki Te Oneroa a Tohe.
Ko tā David Penny o te Kaunihera, kō atu i te rua rau ngā whenua o te aō ka kite i taua hōtaka, koira te pāinga mō Aotearoa, mō Te Hiku o te Ika hoki.”
Heoi arā ngā ihu oneone e tohe ana, ko tā Haami Piripi o Te Rūnanga o Te Rarawa, “e hapai ana te pakeha I te Pakeha, ko te ahua nei e pōhehe rātou ko rātou ake ngā rangatira o tēnei wāhi."
I te Raatu, i whakaputaina e te Kaunihera o Te Raki tana pānui e mea ana
Mai i te tekau mā tahi ki te tekau ma whitu o Maehe, ka rāhui te putanga o te tangata, me a rātou motuka ano hoki, mai nga ara o West Coast Road, Ahipara, tae noa atu ki te awa o Te Paki. Ka tū te rāhui nei mai i te poupoutanga o te rā, tae noa atu ki te rima karaka i te ahiahi.
Ko tā Haami Piripi, “i te mutunga o te rā kotahi noaiho te rōpu kā taea te whakatau i tētahi whakaritenga pēra, ara ko ngā iwi kainga o te rohe.”
He whakāro tēra e hāngai ana ki ngā korero o Raymond Subritsky te Heamana o Te Rūnanga Nui o Te Aupouri, ko tāna “he wāhi tapu ra tenā ki a tātou te iwi Māori ko tēra te ara wairua, e haere nei ra rātou ki te rerenga wairua.”
Heoi ano kua whakapāha mai te Kaunihera o Te Raki, kihai te āhua o te whiriwhiringa nei, i tika. Ko te patai pea kei mua i te aroaro o ngā iwi inaianei, ko te kite, he pēhea nei te nui o ngā whetu kamokamo i riro i te Kaunihera mo tā rātou whakāetanga.