Nō te poupoutanga o te rā, ka whārikitia te petihana pōti hei aukati i te hokonga atu o ngā hea a nga kamupene e mau tonu nei i te Kāwanatanga, ki mua i te aroaro o te Karaka o Paremata.
Tōna kotahi tau e whāia ana, ā, kātahi tonu nei pea ka rangona te reo o te motu whānui.
I te rā nei, whakatakohia ai tētahi petihana e ngā rōpu āpetihana ki te tari o te Karaka. He toru rau iwa tekau mā rua mano nga waitohu ō runga e tono ana kia whakatūria he kōwhiringa-ā-iwi hei karo i te hokotanga ō ngā rawa Kāwanatanga.
Ko tā te kai-ārahi o Reipa ko David Shearer, nā tēnei e kore e taea te Kāwanatanga te huri tuara ki ngā karanga ā te marea.
Engari ko te ahua nei, he taronga kōhatu tā te Pirimia tuarua, a Bill English, ki taua karanga.
Ko tāna i te mohio kē te motu, ngā rōpu apetihana hoki ki te whāinga o Nahinara ki te hoko i ngā rawa ā motu heoi kihai rātou i tautohe i taua take i te wā o te pōtitanga ā motu. Nā reira ko tā English kei i a Nahinara te mana ki te hoko atu i ngā rawa o te motu.
E ai ki te Apetihana, He kōrero paki noa ta te Kāwanatanga mō tōna mana whakahāere.
Heoi, he kupu tohutohu tā te kaiwhakahaere o te Pāti Mana a Hone Harawira, ko tāna “ahakoa kua rongo e kore rātou e whakarongo, nā reira mē whawhai tonu mātou”.
Hei nga marama e rua ka puta te whakatau ā te tari o te Karaka, mēna rānei ka tahuri te motu ki te pōti i te take nei, engari ehara i te mea ka herea te Kāwanatanga e nga hua pōti, na reira ka whakangūtia ano pea te reo o te iwi.