He hanga porowhita te papatakaro, ia hāwhe o te porowhita te whenua o ia kapa, kei waenganui ngā pēke e tohu ana i te kēti wehenga atu me te hokinga mai o te kaiurutomo.
Kotahi te kaiurutomo ka wehe atu i te kēti, ka pā ia ki tetahi o ngā kaiārai tokowhā o te hoariri, katahi ka hoki ano ki te kēti, ā ko taua kaiārai i pā atu nei aia ka whai iaia, ka hopukina, ka rutua ki raro, ka pupuri hoki, na te mea e toru tekau hēkona noa iho te wā mo te kaiurutomo mai te wehenga atu i te kēti, ki te hokinga mai.
Ina hoki ora mai te kaiurutomo nāna te piro, mena ka mau aia i te kaiārai pau noa te toru tekau hēkona, koia kē ka whiwhi i te piro. Koia nei te tākaro rongonui rawa atu, i heke mai i ngā whakapapa hïtori a te iwi Punjabi, no te Raki o Inia.
I tae tuatahi mai te iwi Punjabi ki Aotearoa nei, neke atu i te kotahi rau tau ki muri, ā tae noa mai ki tenei rā kua tata ki te tekau mano ngā Sikh Punjabi kei konei e noho ana. Heoi no te tau 'Tahi mano, iwa rau, iwa tekau ma iwa' ka tū ta ratou whakataetae Kabaddi tuatahi i Kirikiriroa, inaianei he maha ngā whakataetae ka tū ia tau, i waenga i ngā karapu kei ngā rohe huri noa i Aotearoa. Ko ngā kaitākaro Kabaddi katoa o konei, he tāne.
Otira, i tae atu te "Kapa Aotearoa Wāhine Kabaddi" ki Tauranga i tera wiki, ki te whakātu ia rātou nei pūkenga ki te iwi Punjabi, na runga i te powhiri a te Karapu Sikh Sports o Mataatua rohe. He wāhi ano hei mātakitaki ma ngā wāhine nei, i ngā tāne e takaro ana.
Tūturu i whakamihia te kapa nei e te iwi Punjabi, mo to rātou kaha, mo to ratou pakari, ā ko nga hua i puta ko ngā tautoko ā-waha, ā putea nei mo ta rātou haerenga hei māngai mo Aotearoa ki ngā whakataetae o te ao.
Otira, hei whakahōnore i te takaro Kabaddi me te iwi Punjabi, e whakawhiti ana te Kapa Kabaddi Wāhine ki ngā whakataetae o te ao, me te hāngai tahi o te whakāro ki te wikitōria, kāre i kō atu, kāre i kō mai.