He hākinakina e whanake ake ana i te ao whānui.
Hei ēnei rangi okioki ka tū ngā toki nō Aotearoa nei a Mark Hunt, rātou ko James Te Huna, ko Dylan Andrews ki te mura o te ahi Octagon.
He tauwhāinga e karapine mai ai te marea.
I ahu mai te taumāhekeheke nei i Amerika a kua puta ki ngā iwi o Ūropi. Anō nei he whakataetae kua whakatūhia ki Ahitereiria.
Nā whai anō te pātai i whiua ki a Tom Wright, kaiwhakahaere matua UFC mō Ahitereiria, Kānata, Aotearoa hoki, āhea ka whakatūhia ki Aotearoa?
Kāore e kore ka kapi katoa te wāhi nei te hunga taunaki nō Ahitereiria, ā puta noa i te ao me te aha, he tangata anō nō Aotearoa ka tae mai ki te mātakitaki.
Ko Mark Hunt rātou ko James Te Huna, ko Dylan Andrews anō hoki ngā tino ihu manea o te momo huihuinga whawhai nei.
He kaiwhawhai a Te Huna o te reanga Light-Heavyweight, ā, ka pakanga atu ki a Mauricio "Shogun" Rua.
Ka whawhai atu a Hunt ki te toki nei ko Antonio "Bigfoot" Silva.
Ka tū hoariri atu a Dylan Andrews ki te mahuri tōtara nei a Clint Lester.