Inānoa nei ka whakahokia atu tētahi mētara nā tētahi rangatira o Te Tai Tokerau i ngaro ki Ahitereiria ki te kāinga.
Pakaru mai ana te wairua porotēhi i ētahi Māori ki te whakakore i te hokotanga atu o te mētara, ā kei te takiwā o te toru mano tāra.
He rua rau mā waru tau nō te tukunga o tētahi mētara hiriwa ki te rangatira o Ngāpuhi, a Te Pahi i a Kawana Phillip King, ki ngā tai o Aotearoa whakahokia mai ai te kura i ngaro ki Ahitereiria.
He rangatira whaimana a Te Pahi ki a Ngāi Tauiwi o roto o New South Wales, puta noa hoki i Ahitereiria. Nā tana kaha aro ki ngā ture Pākehā me ngā taputapu Pākehā i rangatira ai ia. Ināianei e ahei hoki ana āna uri ki te whai mana.
Mei kore ake te hononga o Te Papa Tongarewa me Tāmaki Paenga Hira i whai hokinga mai ai tēnei mētara.
Kīhai te wāhi whakamaru i te mētara kia whakatauhia, heoi mā te mahi tahi a ngā whare taonga e rua nei, me ngā uri a Te Pahi, ka tiaki pai i tēnei taonga whakahirahira ō rātou.