Kua mānu te whakaaturanga o Ngāti Toa Rangatira me te whakaekenga atu o te mana whenua ki Te Papa Tongarewa, ki te kite i āna kōrerō e noho whera ana hei taonga mātakitaki mā te motu.
Hei tā Taku Pārai, “Tēnei tau he tau whakahirahira mō mātou, i hainatia tō mātou kereme tuatahi, ka rua, kua tae mai ki roto te whare nei, hei takoto o mātou taonga tuku iho, tuatoru me huri ake rā ki te mihi atu rā ki a matou nei, ki ngā uri o Ngāti Toa Rangatira kua tae mai ki te manaaki, ki te tautoko i a mātou i te ata nei.”
Hei tā Arapata Hakiwai, Kaihautū o Te Papa Tongarewa, he wā anō tēnei hei hora i ngā kōrerō mō te mana whenua o Te Whanganui a Tara, ki ngā iwi o te motu, o te ao anō hoki.
“He rā nui tēnei i te mea kua tuwhera te whakaaturanga taonga o Ngāti Toa Rangatira, me kii ko Whiti Te Rā nō reira kua eke nei te tini me te mano o Ngāti Toa Rangatira ki roto i te whare o Te Papa, nō reira he honore nui mō mātou o Te Papa Tongarewa.”
Ka whakaaturia atu ngā kōrero o Whiti Te Rā, mō ngā tau e rua me te hāwhe.