Ko Peggy Turuhira Noble rāua ko Susan Leigh Cleveland ērā i pūhia kia mate inanahi, ā, e rua ngā whakapae mō te kōhuru, kotahi hoki mō te whakamātau ki te kōhuru i a Lindy Curtis, kua ūhia ki runga i a Russel John Tulley, i tū ki rō kōti i te ata nei.
Ināianei, ko te noho marutau o ngā kaimahi o Te Tari Hiranga Tangata e kōrerotia ana.
E pokea tonu ana te taone o Hakatere e te pouritanga me te pōkaikaha i te pūtanga o ngā wāhine kaimahi tokotoru, mate atu ai e rua o ratau, i te tari hiranga tangata o te taone.
Heoi he tāne anō i tau atu ki mua i te kōti i tēnei rā, mōna i whakaweti i ētahi kaimahi hiranga tangata i Heretaunga me tētahi maripi inanahi, ā i tēnei rā anō i kapi te tari hiranga tangata o Waiharakeke i te whakatumatuma a tētahi.
Nā whai anō i pupū ake te hiahia o Edwin Perry, tētahi kanohi kitea i ōna hāpori o Te Waiariki tae atu ki Te Wairarapa, he kaimahi i te tari o Winitana Pita i ngā marama kua hori ake hoki, ki te kōrero mō ōna āwangawanga nui i te tokomaha haere o ngā apataki o te Tari Hiranga Tangata e toro atu ana ki a ia,
Kāore ia i te whakawātea i ngā mahi tūkino a ētahi apataki, heoi hei tā Perry, kei te pīki haere te kino o te noho o te hunga whakaraerae, he nui ngā tauira i whākina mai e ia ki a mātau, koinei tētahi anake.
Ko tōna wero ināianei ki te Minita Whakahiato Ora me tōna manatū ki te āta aruaru i te tika o ngā whakahaere o tōna tari.