Ko te penihana kaumātua tētahi kaupapa i toko ake ki te pae o Kōwhiri Tekau Mā Whā ināpō, hei taupatupatu mā ngā kaitono a Henare Kani o Te Rōpū Kākāriki, rātou ko Marama Fox o Te Pāti Māori, ko Te Hamua Nikora o MANA, ko Meka Whaitiri o Te Rōpū Reipa, i te kitenga atu i tētahi kaumātua whitu tekau mā rua tau te pakeke e mahi tonu ana, ahakoa e āhei ana ki te whiwhi i te penihana.
He kaumātua ēnei tokorua nō te takiwa o Tokomaru. Engari e mahi tonu ana rāua hei hepara, ahakoa e āhei ana te whiwhi penihana kaumātua.
I te wā nei, ko te kaumātua ono tekau mā rima tau te pakeke ka āhei te whiwhi ki ngā pūtea kāwanatanga, kei te takiwa o te rua rau tāra ki te koni i te rima rau tāra.
Nā, he koni i te toru tekau mā toru mano tāngata kei te rehita o Ikaroa-Rāwhiti, ā, ko tētahi take matua anō e māharaharatia ana e ngā uri nei ko ngā utu-rēti kei ngā whenua Māori me pēhea e ora ai ngā uri ki runga i o rātou whenua tupuna.
I runga āno i ngā whakatūpato ā Meka Whaitiri ki te arotakenga i te pire Ture Whenua Māori e haere ana i te wā, ko Te Hamua Nikora hoki tērā e māharahara ana.
E ai ki ngā tatauranga pōti o Whakaata Māori ko te mātauranga te take nui o ngā take mō ngā uri o Ikaroa-Rāwhiti.
Hei tērā Rāhina ki te putanga o ngā hua tatau a Kōwhiri Tekau mā Whā mō ngā kaitono o Tāmaki Makaurau, kitea ai mēnā koinā anō tētahi māharahara nui o Tāmaki.