I ngā wā o nehe ko te iwi o Ngāti Wairere tērā i rongonuitia mō ā rātou māra o Te Parapara i Kirikiriroa, he whakatipu oranga nō te whenua, ā, matomato ana te tipu o te kai ki ngā tahataha o te awa o Waikato.
He mahi e kawea tonutia nei e ngā uri o Ngāti Wairere e mau ana ki ngā tikanga whakatō me te hauhake i ngā hua kūmara, i tuku iho i o rātou mātua tīpuna.
Kei waenga i te māra nui o Kirikiriroa e tū ana ko Te Parapara, he wāhi tapu, he wāhi tawhito nā Ngāti Wairere. Koia nei tonu te pūtaketanga mai o ngā kai māra a te iwi, hei oranga mo ratou i ngā wā o mua, na te mōmona o te whenua, me te matomato o te tipu.
E ai ki tētahi kuia, koinei tonu te take i mātirohia ai o rātou whenua e tauiwi i ngā wā o mua.
Ia tau ka whakatōngia he kumara ki tēnei pito o te māra, i raro i ngā tikanga o nehe, tuatahi hei whakātu ki te tini me te mano manuhiri, engari ko te mea nui, kia kore e memeha ngā mātauranga mahinga kai.
Hei te tau e tū mai nei, ma ngā whetū o Matariki e tohu te wā e hauhaketia ai ngā hua o te māra o Te Parapara, me te aha ko aua tikanga anō e kitea ai ngā rawa ka tohatohatia hei oranga mō te iwi.