Ka whakatūwherahia ngā kuaha o te whare taonga o te Kamupene C o te ope Rua Tekau Mā Waru ki Tūranganui-a-Kiwa, ka tū koia te tuatahi o tōna momo puta noa i te motu.
I te kainamutanga ki tōna whakapuaretanga mai hei ngā wiki tata ake nei, i whai tirohanga motuhake a Te Kāea ki ngā taonga ka tāwharautia ki reira.
He whātaretanga whakamīharo ki ētahi o ngā taonga tuku iho kua takoha mai ki te whare taonga hōu nei.
Hei tā Monty Soutar, "Koinei to mātou waimarie kei a rātou tonu. He pai te āhua o ngā taonga ahakoa kotahi rau tau pea kua hipa."
Ahakoa he whare kua mehameha ki te kamupene C o te rua tekau mā waru, ka whakaatuhia ngā kura kāmehameha nō ngā pakanga katoa mai te wā i whai wāhi tuatahi atu a Aotearoa ki te pakanga Boer i te tau kotahi mano, waru rau, iwa tekau mā iwa.
E ai ki a Walton Walker, "Kare e kore ko tētahi o rātou pāpā, tipuna pāpā rānei i haere ki te pakanga i taua wā, engari koinei te whakamaumaharatanga ki a rātou."
Kua tutuki te whare taonga nei i runga i te aroha nui o te hapori, mema whānau mai, rōpū tarahiti mai, pakihi pāmu mai, katoa i tākoha mai ki tēnei whare taonga.