Kei te tatari tonu te whānau o Campbell Paterson, kia puta mai te whakatau mō āhea whakahokia mai ai ia ki te wā kainga kia poroporoakītia e tōna hoa rangatira me āna tamariki tokowhā.
E whakapaetia ana ko David Hickson, he toru tekau mā rua ngā tau, te kaikohuru, ā, ahakoa te hē o te mate, ko te hiahia o te whānau kia anga whakamua.
Kua tekau mā waru ngā ra nō te rā i whakapaea i kohurutia ai a Campbell Paterson, ki Ahitereiria.
Engari ko te āwangawanga nui a tōna whānau o Maraenui, āhea rawa te taonga o te mate whakahokia mai ai.
E ai ki a Matiu Eru, “Te tikanga hoki ka hoki mai ia a tēnei rā ana koira rā te whakaaro engari kei te kite ahau e kore pea. A te wenerei pea ka tino mōhio mātou he aha ngā nekeneke.”
He tangata rongonui i tōna hāpori o Maraenui mo ana mahinga toi, a, whakatakototia ai ngā parekawakawa i ērā o te hapori, hei tohu mahara ki a Paterson.
Ka kitea hoki ana mahinga toi ki Te Ao Marama Te Kohanga Reo. He tauira nui e whakatinanahia ana i roto i ōna uri.
Hei tā Matiu Eru, “Pērā anō tōna tama. Kei a ia katoa ngā pukenga o tana papa he pai mo te mahi i ngā mahi toi nei he pērā anō tana tama i heke tonu mai i ngā tohutohu o tōna papa ana he pēnei anō te papai o ana mahi.”
He māhita o mua hoki a Paterson ki tēnei kura i ōna wā, i kuraina hoki ana tamariki ki konei.
Ki tā Matiu Eru, “I haere ahau ki te kura o Maraenui ki te whakawātea i ngā ruma i mahi tērā tangata, ki te tuku karakia ki ngā mokopuna e kuraina ana ki tēnei kura. Koira ngā mahi a te tangata ara i konei.”
E whakapae ana ngā pirihimana o Queensland i kōhurutia a Paterson ki tēnei whare i roto o Cairns, ā, nā David Hickson te tinana o Paterson i puru ki roto i tētahi pouaka tio, ka hunaia ki te ngahere, toru tekau kiromita te tawhititanga atu i tēnei whare, e rua wiki i muri mai i tōna ngarohanga.
Inaianei e tere whakarite ana te whānau o Paterson i ngā whakanekeneke mō tōna hokinga atu ki te wā kainga.
E ai ki a Matiu Eru, “Kare rātou i te hiahia ki te heri i a Campbell ki te marae engari me neke ki ta ratou kainga. hoki mai e rua noaiho ngā rā i konei ka tahuna kei te pērā te nehu a te tangata nei.”
Ko ngā mahi toi a Paterson hei kura mahara mō ake tonu atu.