Toru tekau mā rima ngā tāngata i roto i te tau kotahi ka kōhurutia nā ngā tūkino a whānau. I puta mai tērā i te ripoata o te kāhui rangahau Glenn Inquiry ara ko te People's Blueprint.
He rua tau te roanga o te rangahau nei, a, nā Ta Owen Glenn te pūtea toru miriona i whakapau hei whakatewhatewha i tēnei rangahau, tūkino whānau. I puta te hapori o Waitakere ki a rātou huarahi matua, me tā rātou ki, me mutu te tūkino whānau.
Kotahi rau rima tekau te hunga o tenei hikoi, e pakanga ana mo te haumarutanga i roto i tā rātou hapori.
Kotahi rau nga whanau ka whakapa atu ki nga tari whakahiato ora e kaha raru ana I te mate tukino a whanau I te rohe o Waitakere ia wiki. Ono tekau orau o taua hunga he Māori.
E ai ki a Ruihana Elia, “Rahi kē mātou, rahi kē mātou o te hauora, ko ngā pirihimana, ko waves, ko ngā iwi katoa o tēnei rohe. Kei konei mātou ki te titiro ki te whiriwhiri he aha ke te huarahi tika kia whakamutu i tēnei āhua te patu wahine, te kōhuru me te takahi i te wairua o ngā tamariki.”
Ki tā Shane White, “Kātahi ka puta ēnei kōrero mai tōku waha ko te tino raru ki o tātou rangatahi i tēnei rā ko ō rātou mātua.”
I roto i tēnei rīpoata o te kāhui rangahau Glenn Inquiry mō te tūkino whānau, toru mano ngā wāhine me ngā tamariki e rapu ana i tētahi kainga whakamarumaru i a rātou.
Tata ki te whā mano ngā whānau e hiahia ana kia korowaitia rātou i te kōti whakamarumaru.
Waru tekau mā tahi mano ngā wāhine kei te whakapā atu ki te Whare Punanga.
He iwa tekau mā rima mano ngā pirihimana e whakapā ana ki ngā whānau kua tūkinotia i roto i te tau kotahi, i roto i te rā kotahi, rua tekau mā rua ngā whanau ka whakapā atu ki a rātou ia rā.
Hei ta Waiora Pene hare o Waipareira, kei te hapori te whakautu nui kia whakamutua tēnei āhuatanga o te tūkino whānau.