Kua tata ki te toru tekau tau nō te whakataetae kapa haka ā-motu whakamutunga i tū ki te Waipounamu.
Kua kawea ngā taonga tuku iho a Te Ahikōmau ki Hamoterangi mai anō i te orokohanga mai o tō rātou kapa pakeke a Te Ahikāroa i ngā tau toru tekau ki mua, ā, ka tū rātou ki te papa whakatūwaewae o a rātou mātua, tīpuna.
E ai ki a Waipounamu Te Karu, tētahi kaihaka o te rōpū, “I tīmata a Te Ahikōmau i te tau rua tekau mā rua engari i tīmata a Te Ahikāroa te rōpū matua i te tau 1993 nā reira tokorua o mātou kapa.
Ko Te Ahikāroa mō ngā kaumātua me ngā tamariki me ngā rangatahi, ko Te Ahikōmau a Hamoterangi ka tū mō ngā whakataetae te nuinga o te wā.”
Hei tā te kaitātaki tāne, a Raniera Dallas, “Ko te kaupapa matua o Te Ahikōmau, o Te Ahikāroa ko te whānau, koina te mea nui ko te whānau, mai ngā pēpi, ki ngā pakeke haere tonu ki ngā kaumātua, koira te mea nui o te kaupapa.
Kua hoki mai Te Matatini, mai i tērā wā i tū tōku māmā i reira, he pēpi ahau e mātakitaki ana i te whānau mai Murihiku i tae mai ki Waitaha. Ki tēnei wā he mihi tēnei ki a rātou, ki a koutou katoa i tautoko mai i a mātou ki Ōtautahi i muri i te rū. I muri i tērā ko tēnei te karanga ki a koutou haere mai, hoki mai a nei mātou ki te mihi atu ki a koutou.”
Ki tā Te Karu, “Hīkaka katoa te manawa, i tērā whakataetae i tū tōku tawa, nā reira he hōnore mōkū kia tū mō tēnei kaupapa hei kanohi mō tōku whānau engari hei kanohi mō tōku taua hoki.
Weriweri katoa ana engari tino hīkaka koira te kupu noa, hīkaka i te wā ka tīmata a Matatini, ko Te Matatini te kaupapa nui, me te manaaki i te manuhiri ka haere mai ki Ōtautahi nei kia pai haere tō rātou noho ki tō tātou nei papakāinga.”