I tae atu te iti me te rahi ki te rā nehu o Henrietta Maxwell ki te marae o Wainuiomata i tēnei rangi ki te poroporoāki i tēnei ruruhi e ngākau nui ana ki te reo Māori me te kaupapa o te Kōhanga Reo.
He tīpua kua ngaro ki tua o paerau, he mareikura o te iwi o Ngāti Porou.
He mahuri tōtara a Henrietta Maxwell i te hapori reo Māori ki Te Whanganui a Tara nei. He kaitautoko ia mō te Kohanga Reo, ā, mōhiotia whānuitia ana ia mō āna mahi tito waiata.
E ai ki a Brian Morris, “Koia tērā te puna waiata, te manutīoriori i puta tōna reo ki te ao ki roto i ngā kōhanga reo.”
Hei tā Taina Ngarimu, “Mēnā hoki atu mātou ki a Tuini Ngāwai, he ngāwari te haere, mō Ngoi, he ngāwari hoki, he pēnei nei e tīraha nei e mate nei.”
E ai ki tetahi o ōna tauira ō-mua o te Kōhanga Reo o Pukeatua, he taha anō tō te kuia ruruhi nei i uaua kitea i ētahi wā.
Ki tā Tautoko Ratu, “He tino hātakēhi nē, ko ngā kupu tawhito ki ai, mōu rā te whiwhi me te katakatanga.”
Heoi i marama kitea tāna i arohanui ai i a te kuia nei. Takoto mai rā e te mōtoi kahotea o Porourangi.