Waipuke ana te marae o Otiria, i te rahi e whakaeke atu ana ki te poroporoāki i a Erima Henare, e tīraha atu ana ki raro i te tuanui o Tūmatauenga.
Otirā, he rite te heke o te ua ki te rere o waikamo ki runga i te marae i te rā nei, e auau ana, e auau ana, e putuputu ana, e hōngoingoi ana.
Katoa ngā hapū o Ngāpuhi nui tonu i tatū mai i te rā nei ki te tuku i ō rātou mihi me ō rātou roimata ki a Erima Henare, i te rā nei hoki i whai wahi āhau ki te kōrero ki tētahi o ana tama ki a Peeni Henare, mema paremata mō Tāmaki Makaurau ko tana hiahia he tuku mihi ki ngā iwi maha i poipoi i tōna pāpā i āia i te nuku o te whenua.
He tangi apakura mō tētahi rangatira o te ao Māori kua riro ohorere nei.
Haruru mai ngā roimata ngā hupe ma koutou ma koe e Erima otirā mō to whānau
Ki tā Peeni Henare, “Kua ngoikore taku tuara i tēnei wā a taihoa ake nei ka pakari anō engari mō te wā nei kua hoki mai au ki roto i a Ngāti Hine e tiaki nei au otirā te whānau Henare e mokemoke nei.”
Ehara i te tikanga e kitea whānuitia ana, ara, kia whakapuaki kōrero te kirimate. Heoi, ko tā Ngāti Hine he poipoi i ana uri kia tū pakari ai rātou ki ngā take katoa. He tauira o te kawai whakapapa i ahu mai ai a Erima Henare.
E ai ki a Hirini Henare, “Kahore mātou āwangawanga ki tērā mō Ngāti Hine tīmata mātou o mātou tamariki kia tū pakari rātou heoi anō i a mātou i konei koia tō mātou hiahia tū mai.”
Ina te ara i tohua mona i noho tahi ai a Erima Henare ki ngā whānau me ngā iwi maha o te motu. Ko te hiahia o Ngāti Hine he tuku mihi, he manāki hoki i a rātou i tēnei wā.
Ki tā Peeni Henare, “Te hononga a karani papa ki te Kingi a Koroki heke iho ki a te Atairangi Kahu a ka mate a karani pāpā ka e pāpā taua tūranga.”
I reira hoki te tautoko mona i tōna iwi o Ngāti Hine, rātou i whakatipu i ana tamariki i a ia e para ana i te huarahi ki te arataki i a Ngāpuhi whānui, waihoki, te iwi Māori.
Kāti hei āpōpō takoto tonu ai a Erima Henare ki Otiria Marae, hei te Rātapu kawea ake ki tōna ukaipō ki Motatau, ā, hei te Rāhina nehua ai.