Ko Kingi Tuheitia tera i whakaeke atu ki runga o Otiria Marae i te rangi nei ki te poroporoaki i a Erima Henare, rangatira o Ngāti Hine. He hononga tawhito to te iwi o Ngāti Hine me Waikato-Tainui, i takea mai i nga kawai whakapapa.
He haka pohiri mo te Kingi Maori hei whakahonore i a ia me te hononga o Waikato-Tainui ki a Ngāti Hine.
Hei tā Tukoroirangi Morgan, "Na Erima i tohua e te motu kia kawea te korero o te motu ki a Tūheitia koia hei Kingi. I tae ena korero i mua mai i te ra o te nehu o tona whaea i a Te Arikinui Te Atairangikaahu. E pera ana te whakaharahara o te kaupapa nei."
Ko Erima Henare tetahi mema o te kahui tekau ma rua a Kingi Tūheitia, te kaupapa o te waiata koroua i tapaina e te kapa haka o Motai Tangata Rau.
Hei tā Paraone Gloyne, "Ko tenei tangata te takenga mai o tera waiata ina nana hoki nga whakautu ki etahi o nga whakawhiu ki te Kingitanga. Noreira koinei i whai wahi ai ia ki te whiti tuatahi. No reira e patai ana te ngakau ka pewhea inaianei i te mea ko tera waiata mo te hunga ora, he hou tera ahuiatanga ana kuan aua rongonui haere pea hoi ano i rongonui i a ia i tipu ai te whakaaro nana."
E ai ki a Gloyne kua pouaru te reo Maori i te rironga o Erima Henare, ina koia te pokowhiwhi kaha mo nga tau maha nei.
Hei tāna, "He tohunga ki te tuitui i nga whakaaro i ona whakaaro ki te whakato hoki i ona whakaaro ki etahi atu ano nei na ratou ena whakaaro engari nana ke. Koinei te momo kua ngaro."
Erima o Ngāti Hine. Erima o Te Reo Maori. Erima o Poneke. Erima o Nga Hau e Wha. Kua tae mai, kua tae mai, kua tae mai.
Ae marika he maha ona potae, aa, e ai ki a Tukoroirangi Morgan ehara tena i te mahi mama noa.
"Maringi mai ana te kupu ahakoa Pakeha ahakoa Maori. No reira i tupu ia ki roto i nga ao e rua koia te kuaha i te ao Maori ki te ao Pakeha," hei tā Morgan.
Ahakoa kua kati inaianei te tatau, ko tona ohaki ka ora tonu.