Nō te putanga mai o te whakatau i tērā wiki mō te konohete e kōingotia ana e te tini me te tīmatanga hoki o te hoko tōmua i ngā tīkiti i tēnei ata, e matapaetia ana ka tino eke anō a Soulfest Auckland 2015 ki te angitū.
I tēnei tau, ka whakatū a Soulfest International i ngā konohete Soulfest e toru, arā ki Poihākena, ki Poipiripi me Tāmaki Makaurau hei ngā rā e toru o te hararei mō Te Rā Kai-mahi i Aotearoa nei.
Ko te rārangi kai-whakangahau i tēnei wā, ko ngā whetū rongonui i te ao, ko Mary J Blige, ko Jill Scott, ko Jhene Aiko, ko Charlie Wilson, ko De La Soul, ko Talib Kweli, ko Dwele, ko Eric Benet me Floetry.
He whakapuakitanga tuarua mō ētahi atu kai-whakangahau e matapaetia ana ka puta ākuanei.
I te tau 2004, e hia manomano nei ngā kai-whaiwhai soul me te hip hop i karapinepine atu ki ngā konohete tuatahi, e ai ki te whārangi ipurangi mō Soulfest. I tēnei ata, ko ngā tīkitī tōmua Platinum VIP motuhake mā ngā mema Soulfest i pau i roto i te haora kotahi.
I te konohete ki Ngā Puna o Waiorea i tērā tau, he haka tene noa ake i hakaina e Wairangi Koopu, e Stan Walker me ētahi atu ki ngā kai-whakangahau i muri i te atamira, nā te īnoi a Angie Stone.
Nā Zen Ginnen o te rōpu Ginnen te kōrero, he pōhiri ōkawa ki ngā kai-whakangahau e whakaritea ana i tēnei tau, mātua rā ki te tokowhitu, tokowaru rānei o ngā kai-mahi e haere mai ana ki Aotearoa mō te wā tuatahi.
Hei tāna anō, nā te mea he poto noa te wā ki ngā kai-whakangahau i Ahitereiria me Aotearoa, he tokoiti noa iho pea o rātou ka noho mai mō tētahi rā anō ki te tirotiro haere.
Hei tā Ginnen, ko ngā korero i hoki ki a ia i muri mai i te konohete Soulfest i tērā tau, he "mīharo", ā ko te matapae anō i tēnei tau, ka pērā anō te urupare a ngā kai-whaiwhai Soulfest e ngākaunui nei ki ngā pūoro Soul, RnB, Hip Hop me te Funk.
Ko te whakatau anō a Soulfest International, ko te wāhanga makau o te hui, ko ngā toa hoko kai "soulfood" ka kitea anō i tēnei tau.
Ko ngā wāhi me ngā rā o ngā konohete:
- Poihākena - Rāhoroi 22 Whiringa-ā-Nuku i The Domain
- Poipiripi - Rātapu 25 Whiringa-ā-Nuku i te Myer Music Bowl
- Tāmaki - Rāhina 26 Whiringa-ā-Nuku i Ngā Puna o Waiora
Mō ētahi atu whakamārama, toro atu ki www.soulfest.com.au