Kua tīmata te rerenga tuarua o Marae Kai Masters ki runga i a Whakaata Māori, ā, e tūmanako nui ana te kaihautū o te hōtaka, a Te Kohe Tuhaka ka eke anō ki tua atu o ngā taumata i whakaritea e te rerenga tuatahi i tērā tau.
He hōtaka e kitea ai ko wai rā ngā tino ringa-wera kei tēnā marae, kei tēnā marae.
E ai ki a Te Kohe Tuhaka, “E ngākaunui ana nei ki ahau e kite nei i ngā ringa wera e tipu ake ana i a rātou nei mātauranga mō te tunu kai e tupu anō ā rātou nei āhuatanga ki te whakaaro mō te hauora me tō rātou nei puku kaha kia mahia te mahi nōtemea ka nui ngā taonga ka whai i tō rātou nei marae, me te tīmā ka wikitōria."
Koinei te tuarua o ngā terenga-hōtaka kua tū ai a Te Kohe Tuhaka hei kaihautū, ā, hei tāna he kai nui tēnei mā te kaimātakitaki.
Hei tā Tuhaka, "He nui ngā amuamu o roto, ā, i waenganui i ngā ringa wera me tō rātou nei marae engari ko tērā anō tētahi me kii kinaki ka uru atu anō ki tēnei o ngā hotaka, ki te kore tērā ka āhua i roto i te reo pākeha, boring kē te āhua nei engari ehara ēnei ringa wera i te boring."
Tekau katoa ngā marae e pakanga ana mō te tohu nui, ā, ka aronui ki te whai māka nui me ngā kaiwhakawā.
E ai ki a Tuhaka, "Tētahi o ngā hotaka ka tirohia ki te taha ki te hauora, engari ia rerenga o tēnei o a tātou nei rerenga tuarua he whakaaro ki tērā taha hauora. Engari ko te whakaaro nui kia puta mai te namunamua o te kai tuatahi me te whakaaro anō mena ka kai koe i roto i te ao hauora kāre he mea kino tērā ka taea tonu te kai i ngā kai reka ki a koe, ā, he pai mō to hauora."
Tekau katoa ngā hōtaka kua whakaritea, ā, ka rere tonu ki runga Whakaata Māori tae noa ki te mutunga o Hurae.