E rua ngā tāngata kua tū ki roto i te kōti a rohe o Rotorua i runga i ngā whakapae patu tangata whai muri i te matenga o Moko Sayviah Rangitoheriri, toru tau noa iho te pakeke ki Taupō i te Rāhina.
E whā tekau mā ono tau te pakeke o te tāne, e rua tekau mā ono ngā tau o te wahine kaare i whakaputa whakatau ki te kōti, ā, ka ūhia ō rāua īngoa ki te tapu.
Ko tā ngā pirihimana o Te Waiariki, i mauheretia te tokorua nei mō te patu tangata, ā, ehara rāua i te whanaunga o Moko.
Kua whakamātauria e ngā pirihimana te kāinga ki te tiriti o Marshall Ave ki Taupō i ngā rā e rua nei. I tae a Moko ki te hōhipera o Taupō i te ahiahi o te Rāhina.
I mate ia i mua i tōna whakawhitinga atu ki te hōhipera o Starship i Tāmaki Makaurau. Ko te whakapae mō te patu tangata kua tau ki runga i te tokorua nei, ā, ka noho mauhere tonu tae noa atu ki tā rāua tū ki te kōti a rohe o Taupō hei te tekau o Mahuru.
Kei te hiahia tētahi Rōpu Māori Whaitaua Tamaiti ki te whakahaere i āna ake tirohanga ki te matenga o Moko Savyiah Rangitoheriri. Hei tā ngā kōrero a Kuni Jenkins, māngai o He Mana Tamariki, he rangahau anō e hiahiatia ana kia mōhio ai i ngā take e whakamatehia ai tētahi tamaiti ia rima wiki.
E ai ki a Kuni Jenkins, “Ka tere mātou ki te whai atu he aha te take i patu tēnei tamaiti, ā, nā wai i patu.”
I whakarewaina a Mana Ririki i te tau 2008 hei āwhina i ngā hapori Māori mō te tūkino whānau. Ka mahi tahi rātou me ngā umanga puta noa mō te hunga tamariki kei wāenga i te kore ki te rima tau te pakeke, mō ngā whānau e mate ana i te tūkinotanga.
Hei tā Jenkins, “Ētahi o ngā māmā he tamariki tonu. Engari kāre rātou i te mōhio ki tō mātou reo, kāre rātou e mōhio ana ki ngā tikanga. Ko te tangata i uru i te tuatahi mehemea he Pākehā, me pēhea te kōrero ki tēnei whānau Māori.”
Hei tā Child Matters, kotahi te tamaiti i roto o Aotearoa ka kōhurutia ia rima wiki. Ko te nuinga o ēnei tamariki kei raro i te rima tau te pakeke. Kei te hiahia a Mana Ririki kia aro atu ngā māngai ā ngā iwi puta noa ki te whakamutu i tēnei āhuatanga.
E ai ki a Jenkins, “Koirā tā mātou tino hiahia ināianei. He nui ngā tono i ngā rohe kia haere a Mana Ririki ki waenganui i a rātou.”
Hei te wiki e tū mai nei ka whakahaeretia a Whānau Ora Partnership Group i tētahi hui ki te Pāremata i wāenga i ngā minita me ngā māngai o ngā iwi mō te tūkino whānau me te patu tamariki hoki.