He rau tāngata, he rau o te huia te karapinepine atu ki Ruaihona Marae i Te Moana a Toi i tēnei rā ki te poroporoāki atu i a Putiputi O'Brien i mate i tēnei wiki i tōna tau iwa tekau mā toru. Ko tōna pūmau ki te hauora Māori me ngā nēhi Māori, i tohua mai ia hei pou mā Te Kaunihera Nēhi Māori o Aotearoa.
He wahine i whakapau kaha mō te marea.
Kāre e kore he mea ako tēnei nā ōna mātua a Eruera rāua ko Pareake Manuera.
"Tērā momo whakatipuranga i kaha mōhio nei ki te tiaki i te tangata, ngāwari tana āhua engari ko te nui o te aroha ki tana iwi," hei tā te Minita Whakawhanake Māori, tā Te Ururoa Flavell.
Anō he putiputi kua puāwai ki te ao manaaki tūroro. He kaihāpai a Putiputi i roto i te hauora Māori me te mātauranga.
Ko te whakatau a Joe Harawira ,"Koia te Nēhi Māori tuatahi i roto i a Aotearoa whānui nei, ko ōna mahi mo tōna iwi kei te kite ake i roto i wana hāereere i te motu nei."
Nā ōna mahi ka whakawhiwhi ki a ia te tohu a te Kuini i te tau kotahi mano iwa rau, waru tekau mā whitu mō āna mahi hapori, toko i te ora ki ngā rōpū maha.
E ai ki a Te Ururoa Flavell, "Te Arawa, Ngāti Awa, Mātaatua ka tangi ki a ia koia tērā ka noho nei hei tauira ki tēnei momo āhuatanga mō te manaaki i te tangata."
Ka waiho mai a Putiputi O'Brien i āna tamariki tokotoru me āna mokopuna, mokopuna tuarua hoki. I hari atu ia ki tōna okiokinga whakamutunga, pā tata ki ōna mātua ki te urupā o Kōkōhinau Marae, Te Teko.