Ka nui te tautoko a ngā iwi i Te Hiku o te Ika kia porotēhi ngā uri ki tētahi hui a ngā rangatira o Statoil. Hei te ata o te Paraire hui ai rātou me Te Kaunihera ā-rohe o Te Tai Tokerau ki Whangarei i runga i te whai kia tutuki ngā whakaritenga o tō rātou raihana kōwiri hinu i te papa moana.
He āhuatanga ēnei e kite ai te moana atu i Te Reinga inā oti pai ngā uiuitanga a Statoil me te iwi.
Hei tā Hinekaa Mako o Te Rōpū Taikaha, "A te ata ka huihui mātou ki waho nā te mea ehara tēnei kamupene e haere mai ana hei hāpai i te iwi Māori. E haere mai ana rātou ki te hāpai i a rātou pūtea, koirā anake!"
Ko Taikaha he rōpū Māori i tae ā-tīnana atu ki Norway i te marama o Mei hei kōkiri i o rātou na whakahē ki te aroaro o Statoil me te iwi Saami.
E ai ki a Mako, "Te kii a te rangatira e tino tautoko ana ngā mahi a ngā tāngata whenua Māori o tēnei motu o Aotearoa."
Hei tā Mike Smith o te Rōpū Taikaha, kua pakaru pea o rātou taringa. Me tiaki kē rātou i o rātou ake tamariki mokopuna mai i ngā tūkinotanga o te wā, te mahana haere o te ao, kia waihotia tō mātou taiao ki tēnei taha o te ao.
Ko tētahi o ngā whakaritenga o te raihana kua tukuna e Kāwana mā Statoil hei kōwiri i te papa moana kia whiriwhiri ngātahi rātou me te iwi Māori. Engari he mahi tēnei e whakatekangia ana e ngā iwi o Te Hiku o te Ika, a Ngāti Kuri, Te Rarawa me Ngāti Kahu, kua oti te tono ki Te Rōpū Whakamana i Te Tiriti o Waitangi e pā ana ki ngā pānga o ēnei mahi ki te mahana haere o te ao me ngā tūkinotanga ki te taiao.
Ko tā Smith whakapae, ko te tahu i ngā kōhinu te raru nui, ā, ki te kore te tangata e aukatia ērā tūmomo mahi, ka raru ko ngā uri whakaheke.
"Kotahi te kōrero e kii ana, waiho te papa moana. Me hoki atu a Statoil, kaua e whakararu i o tātou moana, i o tātou whenua," te kii a Mako.