Kua kapi ohorere te ringa toko i te ora o Te Poari Māori o Te Aupōuri. He raruraru nui i pūtake mai i te taha whakahaere pūtea.
Tekau mā rua ngā tūranga mahi kua riro, i te kapinga ohorere o ngā ratonga toko i te ora a Te Poari Māori o Te Aupōuri.
Hei tā Henry Ihaka o Te Poari Māori o Te Aupōuri, ko ētahi o ngā ratonga i aukati i te pō ra, ā, i wehe hoki ngā kaimahi. Ināianei kei te mahi tahi te poari me te Manatū Toko i te Ora kia whakawhiti atu ngā rātonga nei ki ētahi kaihautū hōu.
Kua uru mai ngā ōtita ki te arotake i ngā pukapuka e kite ai e pēhea te nui o te moni kua riro.
E ai ki a Te Ururoa Flavell, Minita Whakawhanake Māori, "Kei te nui te aroha ki a rātou, engari me ruku ki te hohonutanga o te take, he nui te moni e noho ngā take e tārewa ana, he tika kia ruku hohonu i te take nei."
I konei ka whakawhiti ngā kaupapa o Social Workers in Schools, a "Hippi" ko ngā mātua hei kaiako tuatahi, me Project Haere e tono ana i te hunga kore mahi ki Ōtautahi, mai ai mā rōpū kē e whakahaere. Anā kua hokona kē e Te Aupōuri o rātou ake kaupapa o Number Works and Words me Kiwi.com.
Ko tā Ihaka kōrero anō, ka haere tonu ngā ratonga engari mā tētahi atu e kawea. Kua roa hoki te pōari e mahi ana kia whai hua ai te hapori.
E ai ki a Flavell, "Ko te mate kē, e mōhio ana māua ko te Minita Take Tiriti, taihoa ake nei 3-4 wiki ka eke te pire o Te Hiku, ā, hei taua wā ka tukuna ngā rawa, ngā uauatanga rānei ki Te Rūnanga hōu, arā, te "post settlement", ko te mate kē ki te tuku ngā nama, kaua ko ngā rawa - he mate kei te haere."
Kia oti rā anō te arotakenga, ka mōhio ai he aha pū i raruraru ēnei whakahaere.