Ki te rīki, kei te wiki whakamutunga tātau o te whakataetae Fox Memorial, ā,he pakanga nui i kitea ki waenganui i te nama rua me te nama toru o te kauwhata whakataetae kia kitea ai ko wai ka eke ki te whiringa toa hei hoariri mo te kapa Mt Albert Lions.
I puta kirihaunga mai ngā Sea Eagles ki ngā Pt Chev Pirates, ko ngā tatau he rua tekau mā rua ki te kore.
He pakanga i tū kia kite mā wai e uru ki te whiringa toa, ko te kapa ka hinga, ka ngaro i tēnei tau tākaro.
E rua ngā wā i turaki a Papakura ia Pt Chev ki te whakataetae i tēnei tau. heoi te āhua nei he akoranga o ngā hapa i kitea e ngā Pirates, na konā i riro i a rātou te piro tuatahi o te tukinga.
I raru te kapa Sea Eagles i a Terrence Phillips, tā rātou waitīkape e noho tamō ana he whara te take, ka mutu, i kitea tōnā korenga i te korenga hoki o te kapa i eke ki te rārangi piro.
Ahakoa te wā ki a rātou, i tata whai piro ngā Sea Eagles.
Hēoi, he hanga noa te āhua ki ngā Pirates, ā, i whai piro anō rātou i mua i te wehenga rua, kia tekau ki te kore ngā tatau.
He rua tekau mā rua meneti te roa kia whai piro anō ngā Pirates i te haurua tuarua o te tukinga.
Ā, i ngā mēneti toenga e tekau nei ki te tukinga, i whai i ngā Pirates tā rātou piro tuawhā, kia whai anō rātou he tūranga ki te whiringa toa.
I kokea tonu ngā Sea Eagles ki te rārangi piro, engari he pakari rawa te taha ārai o te hoariri.
I te otinga ake he rua tekau mā rua ki te kore ngā tatau whakamutunga ki ngā Pirates, me te manako ka toa anō rātou i te taitara mo te wā karapīpiti tuatoru ki te kapa Mt Albert lions.