He pikitia ngangahu o ngā tamariki kua mate i iria e te Ōpango a Sonny Bill Williams, ki tana pae tīhau te take kei te tōtara wāhi rua ngā uruparenga ki runga i te pae pāoho kōrero. He pikitia i puta nō muri i tana haerenga ki ngā puni rerenga o Syria ki Lebanon.
He mea whakaatu i te toimahatanga o te hunga rerenga tamariki ki Lebanon, me te pātai a Williams, "I ahatia ngā tamariki kia whēnei ai te hua?"
E taunaki ana tētehi pononga Muhirama i a ia.
Hei tā Te Rata Hikairo, “Ko tāna e tino hiahia, ki te whakahōnore i a rātou me te maumaharatanga i a rātou, ka tahi, ka rua, ki ōku nei whakaaro, kia mōhio whānuitia te ao katoa, ki te kino o tēnei mea te pakanga.”
He putanga tēnei nō muri i tā rāua ko tana hoa māngai mo UNICEF a Mike McRoberts, kairīpoata hoki mō te Pouaka Whakaata Tuatoru haerenga ki ngā puni rerenga o Syria ki Lebanon.
Engari, ko te pātai kē, mēnā e tika ana kia kitea ai ngēnei tūmomo whakaahua ki runga i te ipurangi?
Hei tā Te Rata Hikairo, “Ahakoa kua takahia wētehi o ā mātou tikanga, i runga noa atu i te tikanga ko te aroha o te tangata, ko te aroha o te tangata.”
Ko te whakapae a Williams, kāore ia mo te nohopuku noa ki tēnei take e pēhi ana i ngā iwi o te Middle East.