Ko te rangi tuatahi tēnei o te Whakataetae Waka Ama ā-Motu ki Karāpiro. Neke atu i te kotahi mano rima rau ngā kaihoe nō ngā karapu ono tekau mā rima huri noa i te motu e whakataetae ana.
Ahakoa he hākinakina tēnei mō ngā reanga katoa ko ngā tamariki te aronga i tēnei rā. Ko te wāhanga midget i whakapeto ngoi i runga i te ūpoko pakaru kia eke panuku.
Ahakoa kaitā ake ngā hoe me ngā kahuora i a rātou, kāore he mahi i kō atu mō ēnei tamariki.
Hei tā Tū Te Wehi o Ruamatā, "I pai te reihi mā mātou, i whakapau kaha mātou ki te hoe, i kaha tā mātou hoe, i te amuamu, i te ngenge hoki mātou."
He mea uaua, utu nui anō hoki mā ēnei kaihoe nohinohi te hoe mai ki konei. Hei tā Te Wehi, e rua ngā parakitihi ia rā mā rātou.
E ai ki a Chelsey Reti (Waka Tautoko), "I toru marama mātou i rite mō tēnei."
Mō ētahi ko te taenga tuatahi mai tēnei ki ngā whakataetae ā-motu. Heoi ko ētahi i tae mai i runga i te manawanui.
488 ngā kaihoe e hoe ana i te wāhanga tamariki i tēnei tau, te mea nui rawa i te hītori o te whakataetae ā-motu rua tekau mā whitu tau te pakeke.
He tohu anō e ora pai ana tēnei hākinakina o te waka ama mō ngā tau kei te heke.
Hei āpōpō ka kītea anō ngā whetu ō āpōpō i te tīmatatanga o ngā wāhanga taiohi me J16, ka tū hoki ngā whiringa toa tuatahi o te whakataetae i te wāhanga tamariki.