Ko ngā wāhanga takawaenga me J16 e whai ana i ngā mētara koura i te rangi nei i te whakataetae Waka Ama ā-motu ki Karāpiro. I whakataetae atu ngā tama me ngā kōtiro i ngā whiringa toa W6 500 me 1000 mita me ngā whiringa toa W12 500 mita.
Tekau mā rua katoa ngā whiringa toa i tēnei rangi, i ngā wāhanga e rua o te reanga takawaenga, J16 anō hoki. I whai atu a Te Kāea i te kapa tere rawa atu o tēnei tau i te whiringa toa J16 W6 500 mita, arā te kapa "Fat Oysters" nō te karapū o ngā Kaihoe o Ngāti Rēhia Trust.
He tino reka tēnei mea te koura ki ngā "Fat Oysters".
Hei tā Rua Mano Herewini (Fat Oysters), harikoa katoa rātou i te mea i whakapeto ngoi te kapa i tēnei tau.
Ahakoa ko rātou te kapa tere rawa atu i ngā reihi kua pahure, i wera tonu te tātāwhainga ki te kapa toa o tērā tau, ki a Push to the Max nō Waitākere.
Haunga rā ngā piki me ngā heke, i whakahīhī tonu ō rātou whānau me to rātou kaiako i tō rātou manawatītī.
Ko te kōrero a te kaiako, a Taniora Kai, "Tino mīharo ahau, te kaha o ngā rangatahi i tēnei ata. E hari ana au mō te whānau, mō te hapū me ngā hoa."
E noho ana tō rātou kāpene a Rua Mano Herewini ki Kerikeri. Ko ia te kaihoe toa o te reanga tekau mā ono tau te pakeke, ā, i tawhiti rā te haere ake o ana hoa kaihoe i ngā pito maha o Te Taitokerau kia haratau tahi ai rātou mō tēnei kaupapa.
Hei tā Kai anō, "Koia anake nō Te Tii, nō Ngāti Rēhia. Ko ētahi nō Whāngarei, nō Ngāti Wai."
Heoi, i mārama tēnei kapa, kāhore he hua ki te kore he mamae.
Kua oti katoa ngā reihi ā-kapa a ngā tamariki me ngā rangatahi. Hei āpōpō ka tū ngā reihi takitahi, ā, hei reira ka kitea tuatahitia ai ngā kaihoe pākeke, kaumatua anō hoki.