Kei ōna ake ringa tana oranga ki tua. Koinei te Tari Hiranga tangata mō te mōrehu hōia o te rua tekau mā waru a Selwyn Clarke, e rua marama kua pahure iaianei nō te poronga o tana pēnihana.
E mea ana te mōrehu o te rua tekau mā waru, he nui te tautoko o tōna ake whānau i tana īnoi moni ki ngā tiriti hei oranga mōna.
Hei tāna, "E tautoko ana engari kahore au e tino hiahia kia kumea atu hoki rātou ki roto i ēnei tūmomo take."
Nui hoki te tautoko a te iwi ki runga o Pukamata kia whakatūria he nama hei wāhi koha moni mō tēnei mōrehu hōia kua poroa tana pēnihana nā tana kore whakaae kia haere ki te kōti mō ngā hāmene e pā ana ki te noho porotū a te iwi ki te taunga rererangi o Kaitaia i tērā tau.
Hei tā Tākuta Makere Mutu o Te Rūnanga o Ngāti Kahu, "Āe, kua tukuna atu he koha me ērā, he kai, he koha me ērā atu mea ki a ia. E tino tautokongia tō tātou kaumātua e ngā hapū, e te iwi o Ngāti Kahu, nō reira pukuriri rawa a Ngāti Kahu i tēnei takatakahi i te mana o tēnei kaumātua."
I te rā nei kua mea mai Te Tari Hiranga Tangata ki a Te Kāea, kua mahi kē rātou i te taha o ngā pirihimana ki te awhi i a Selwyn Clarke kia whakawātea i ngā hāmene e utu tonu nei ki runga i ia. Iaianei kei a ia hoki te tikanga ki te whakaoti i tēnei take ki roto i te kōti o Kaitaia kia whiwhi anō ia ki te pēnihana.
Hei tā te kaumātua nei, "E kore au e hou atu ki roto i o rātou nei kōti. Te kaha kii hoki o ngā teka o Chris Finlayson me ngā pirihimana me ngā kōti katoa. Mai rā anō e haere tika ana ōke nei kaupapa mō te rua tekau mā waru mō ngā whenua, mō te Whakaputanga, e haere ana ki tēnei rā, e haere tonu ana. He mahi tōrangapū."