He tīmatanga pai mā ngā kaipararimipia o Aotearoa i te rangi tuatahi o ngā whakataetae Pararimipia ki Rio.
E rua ngā mētara te whiwhi kia Aotearoa me te mētara kōura tuatahi. Tuia atu e whā o rātou i eke ki ngā whiringa toa me te tūtuki wā hōu.
Ko te uri o Ngāpuhi, ko Cameron Leslie tērā i eke pae hōu i te kauhoe rua rau mita i te wāhanga tāne, ka whai wā hōu o te rua mīneti, rima tekau mā rua hēkona kia tae tuatoru mai i ngā whiringa whaiti. Hēoi ka mate ururoa ki ngā whiringa toa i ia e tuki atu ana ki toa o Brazil a Daniel Dias.
Ā ki te wāhanga kauhoe tīraha kotahi rau mita, ko Nikita Howarth rāua ko Rebecca Dubber i kapo i te wāhanga tuatahi me te tuarua kia uru tōtika ki ngā whiringa toa. Hēoi ko Rebecca Dubber i puta ihu mō Aotearoa kia riro i te mētara tuatahi i tāna eke ki te pae rauwhero.
Ko Kate Horan, kaieke pahikaraka, i rere tika i te wāhanga eke pahikaraka toru kiromita. Hēoi hei te kiromita whakamutunga tē taea te karo i a Megan Fisher o Amerika mō te mētara rauwhero. Ka mutu he kore ira toru rima ono hēkona kei muri i a Fisher kia oti mai i te paetuawha.
He tutukinga nui anō mō Liam Malone i te oma kotahi rau mita, ka whai wā hou o te tekau ira iwa kore hēkona hei kake i te rekoata Pararimipia, ka eke ki ngā whiringa toa.
Ā, ko wai atu i te rangatahi a Anna Grimaldi ka peke kōura atu ki te pae tuatahi, kia kapo ake i te mētara kōura tuatahi mō Aotearoa.