Ka piki ake te pakeke o te hunga e āhei ana ki te penihana. Nā te Pirimia, nā Bill English te whakatau i ngā haora tata ake nei, engari ēhara i te mea ka tere pākia te hunga kaumātua.
Ko te kiko o te whakatau ka piki te pakeke o te hunga whai penihana ēngari kāore mō te pērā tae noa ki te tau 2037.
Kua kaha okaokatia te Pirimia mō tēnei take, mai i tana whakatau he ranuranu i te kōhua pea kei tua.
Ko tā Reipa he whai whakaaro ki te whakatau a te Pāti Māori kia taiohi ake te pakeke penihana mō te Māori ki tērā o te Pākehā. I te mea he roa ake te oranga o tauiwi.
E ai ki a Peeni Henare, “Ka whakaaro ake au ki tōku pāpā kaha mahi nei kaha utu i ana tāke ēngari ka mate i mua i te penihana nōreira e āhua tautoko ana i te whakaaro.”
E tautoko ana a Reipa i te whakaaro, ēngari he ara ano ka tāea kia ea te pae tawhiti ōrite.
Ki tā Henare, “Ki te kore te kāwanatanga e whakarite i te penihana mō tāua te Māori a kaumātua me ngā kuia tēnā whakapiki i ngā taumata i roto i te ao hauora kia roa ai te oranga o te Māori.”
I māro a Reipa i ngā kōwhiringa pōti e rua kua pahemo ki te whakapiki i te pakeke o te tangata kei te whiwhi penihana. Ēngari kua huripoki ana whakaaro inaianei ā e ai ki te Mema Pāremata o Tāmaki Makaurau, he tohutohu tērā kua heke totika mai i runga.
Hei tā Henare, “I ngā rā o mua ae ko tēnei kaupapa kei runga i te tēpū. Ēngari i te tīmatanga o te mana kei raro i a Anaru (Andrew Little) koia tana korero e kore mātau e neke.”