I tēnei wā o Matariki, ko Te Puni Kōkiri kei te mahi ngātahi ki ngā pakihi o te hapori o Tāmaki Makaurau me Te Kura ā Rito o Niutana ki te tuku kai me te whakangahau i te hunga e pōkaikaha ana. Ko ngā tatau o Lifewise Merge ki te ara o Karangahape e puare ana, ki te awhi i te hunga kore kāinga.
Eruera Morgan, Te Puni Kōkiri, ‘Hei whāngai i a rātau i te rā kotahi ngā kai Māori e rata ai tāua e rata ai o tāua puku o tāua hinengaro hei oranga tinana hei oranga wairua mō te hunga e noho tirīti ana.”
Hei tāna, kotahi i te rima o Ngāi Māori e noho kāenga kore ana, ā, he rua rau rima tekau rātau e moe ana ki ngā huarahi o Tāmaki ia rā, ia pō.
“Nō reira e hora nei i te puna kai, e hora nei i te puna o ora, i te puna tāngata, i ngā mātāpono i whakaarohia ai e o tāua mātua e o tāua tūpuna kei warewaretia ēnā tikanga o tāua.”
Ko tēnei te tau tuarua kua kōtuia e Te Puni Kōkiri i ngā pakihi hapori me Te Kura ā Rito o Niutana i runga i te karanga o Matariki, hei whakahaumaru i te hunga rawakore e ngaua ana e te mātaotao o te Hōtoke.
“Ko te pā o te aroha, tētahi ki tētahi, tētahi kaupapa ka o ngā tino puta ake i tēnei hākari nui a tāua, a tātau i te rangi nei.”
Neke atu i te rua rau tāngata i tae atu, ā, kei te pīrangi ngā kaiwhakarite kia oho ake te iwi ki wēnei kaupapa i te wā o Matariki.