Ko ēnei ngā rangi e hūnuku atu ai a Whakaata Māori ki tōna whare hōu ki Te Puke o Tara, i te rāwhiti o Tāmaki. Nā runga i tērā, nei rā te whakahoki i ngā mahara ki ētahi o ngā takunetanga nui i puta ake i a Te Kāea, i a Whakaata Māori i ōna tau tekau mā toru.
Ka tākiri ake tēnei o ngā hōtaka i te aonga ake o te rā ki runga o Whakaata Māori i te tau rua mano mā whā me te kaha o tōna au, ao Māori mai, ao auraki mai anō hoki.
Ko te tini rau o Ngāi Māori i pari atu ki Te Hiku o te Ika i te tau rua mano mā whā, ko te Ture Takutai Whenua te take, ā, ki te Whare Pāremata hīkoi atu ai te rangatū rima tekau mano te nui i tōna tōnuitanga.
Koia hoki ko te tīmatanga o te reo Māori motuhake ki rō Pāremata, te orokotīmatatanga anō hoki o Te Pāti Māori.
Ko te urutomohanga o Ruatoki i runga i te whakapaepae whakatumatuma tētahi o ngā kaupapa matua o te tau rua mano mā whitu.
Ko tā ngā Pirihimana i taua wā, he urutomo whai mana tonu nā runga i te papai o ngā kōrero taunaki i te whakapae.
Ēngari ko Tūhoe anahe te iwi i whakapāngia e te ringa kaha o te ture.
I roto i ngā tau tekau, kapi katoa te tira hākinakina o Te Kāea i ētahi o ngā hui nui whakaharahara.
Ko te pueatanga mai o ngā toa hākinakina Māori me ngā hui hākinakina Māori ki te angitū kua kitea.
I tā Heather Skipworth rāua ko tā Missy Mackey whakatū i te huihuinga IronMāori tuatahi i te tau rua mano mā iwa, kīhae rāua i matapae ake ko te hui ā-tau nei ka riro hei kai mā rāua ia rā, ia rā.
E waru tau ki muri nei, he pērā, ā, inā ngā momo o te tangata me ō rātou ake whāinga paetae e piri ana ki te kaupapa.
I te tau rua mano, tekau mā tahi, nā Aotearoa te whakataetae ipu whutupaoro o te ao i whakatū.
Ēngari, ehara ko te whutupaoro anahe te aronga nui i taua wā.
Nā Tūwharetoa-Hikairo hoki te whakaaro kia whakatairangi hoki i ngā kōrero tuku iho mō te haka rongonui, mō 'Ka Mate', i tōna kāinga tūturu, i Ōpōtaka Pā.
Mātakitakihia mai a Te Kāea mā Te Reo hei te 5pm mā Whakaata Māori anō hoki hei te 6:30pm