Ki te marae o Tūrangawaewae pōwhiritia ai ngā kaitōrangapū o te motu. Heoi mō ngā mema o te Pāti Māori ko te āhua o te rārangi kapa ka puta ā ngā rangi tata te aronga o ngā whakaaro i te Koroneihana tuangahuru mā tahi o Kīngi Tuheitia.
Ko te pōti a tūru tā Howie Tamati e whai nei.
Hei tā te kaitono Pāti Māori mō Te Tai Hauāuru, "Kia pono aku kōrero, kāhore he aha ki a ahau kei hea ahau i te rārangi. Ko te aronga nui māku ko te wikitoria i te tūru."
He pērā hoki tā Rahui Papa, te kaitono a te Pāti Māori mō Hauraki-Waikato, "Heoi anō kāre pea e roa nei ka puta ngā rārangi. Kāore he whakaaro kei te whawhai ahau i taku tūru."
Tā Howie anō, me noho ko ngā kaiārahi ki ngā puhi taioreore o te rārangi kapa.
Tā Howie, "Ko tāku e whakapono nei, me noho a Te Ururoa rāua ko Marama ki ngā tūranga tuatahi, tuarua hoki tā te mea ko rāua tonu ngā mema pāremata. Ki te toenga o ngā mema, me whakataetae noa iho nei ngā tūru."
Tā Rahui, "Ko rāua ngā rangatira o te rōpū. I kite tātou i te Hepetema o te tau kua mahue ake nei kua kupae rarirari a John Key, kua kupae rarirari a Little, kua kupae rarirari a Metiria. Kei te noho tonu mai a Te Ururoa rāua ko Marama ngā rangatira o Te Pāti Māori."
E tautoko ana a Rahui rāua ko Howie i te uri hainamana nei a Wetex Kang kia noho ki te rārangi.
Tā Howie, "He tohu tēnei ka tāea te mahi tahi me wai rānei. He tangata pai a Wetex, ā, ia te wā kua tūtakitaki he nui aku whakaaro mōnā."
Tā Rahui, "Ko ia tēnei ko te tau o te manaakitanga o te Māori."
Ēngari kāhore hoki a Tame Iti, tētahi o ngā tino kaitautoko i te Pāti Māori, i te whakaae.
Hei tā Tame, "Waihohia te wāhanga rārangi ingoa ki te haukainga, kātahi anō ia ka uru mai ki roto i ēnei whakanekeneke tōrangapū."
Hei tā Te Perehitini a Tukoroirangi Morgan, kāhore ana kōrero mō te rārangi ingoa a Te Pāti Māori. Hei tāna anō, hei te Tūrei ka puta tūturu nei.