Ko Wipere Takitimu tērā, tekau mā whitu tau te pakeke, te mahuri tōtara hou kia whakaingoatia ki te kapa rīki rangatahi o Canberra Raiders. I kōrero atu a Te Kāea ki te tauira o Manukura ki te whakataetae rīki mō ngā kura tuarua.
Hei tā Wipere Takitimu (Te Whānau a Apanui, Te Aitanga a Māhaki) "Nōku te waimarie, me kī, kua haina au ki te taha o Canberra mō ngā tau e toru kei mua. Nō reira he moemoeā nō te wā e tamaiti."
He kanohi kitea ki te tonamana nei.
He tekau mā wha noa tōna pakeke ka kaha whaia ia e ngā kairapurapu NRL, ka timata tana whakangungu me te kapa Titans.
"Ki te titiro haere ki te taha o ngā kēmu nui, ka taea te kite he māngai mai ngā karapū kei ia kokona o te whīra. Nō reira ki te pai te tākaro ki kōnei, āe ka tika ka hopu i ngā whatu o ērā māngai tērā pea he huarahi mōu."
Ka timata ake tōna kirimana ā muri i tana whakapōtae i te kura.
"Ko te kōrero o Māmā me kaha tonu te aro ki ngā mahi ā-kura, ki ngā pepa whare wānanga me kī nō reira ehara ko tēra noa iho te huarahi mōku."
I tēnei wā, ko te tautoko i tana kura ki ngā whakataetae ā-motu te mahi i a ia ka whakarauora i tētahi wharanga turi.
"He pai ki au te tākaro a ngā tama heoi he maha tonu te mahi mō ngā rā kei mua, ā, he rā hou āpōpō."
E manako ana ka tika ia i mua i tana kake atu ki Ahitereiria ki te taha o tana kapa hou.