Kua eke te tīma haupoi wharekura o Te Kura Kaupapa Māori o Ruamata ki te whiringa toa o te whakataetae haupoi Rākau Orimipia ki Pukekohe. Nō te rangi nei toa ai rātau i te kēmu whiringa whāiti ki a Te Puke, 2-1 ngā tatau. Hei tā te kaiwhakahaere hei tā Tenga Rangitauira, ko te reo Māori tētahi o ngā take e eke ai rātau.
Kei te rere Te Reo Māori ki te papatākaro.
E ai ki a Moko Rangitauira Edmonds, “Tuatahi kāre ratau e mārama ana ki tā mātau e kōrero ana, tuarua he painga hoki i te mea ko te reo te reo matua o te kura nā reira āe, he maha ngā hua ō roto.”
Hei tā Tenga Rangitauira he hua anō, “Ki tērā atu taha o te taiapa nei ki te kōrero ngā kaiako o tērā atu tīma ki a rātau kaitākaro kua mōhio au he aha aua kōrero nā te mea kei roto katoa i te reo Pākehā, nā reira ae he tino hua o roto i tēnei mea te kōrero Māori i ngā hākinakina."
E ai ki a Tenga Rangitauira he āhuatanga tēnei o ngā Kura Kaupapa Māori Aho Matua.
“Kia kaua noa te reo e noho ki ngā pakitara o te kura, kia puta ki te taiao kia puta i ngā pakitara rā, arā, hākinakina mai, kapa haka mai, ki ngā kāenga hoki, kia puta te reo ki te ao.”
Hei tā Moko Rangitauira Edmonds kei te puta ngā hua.
“Kua ea te manako, ko tā mātau manako i mua i te taenga mai ki konei kia uru matau ki te whiringa toa na reira ae kei te pai ngā mahi kei te pai te haere.”
Hei apopo tū ai te whiringa toa.