I mua i te whakarewanga apōpō, i whakatūria he rā mā ngā toa o te whakataetae waiata ā-ipurangi me te whakataetae o Ara Raurangi Aotearoa mō te kiriata reo Māori o Moana. Nā te tohunga whakatere waka a Hoturoa Barclay-Kerr ngā kōrero i hora ki tōna waka a Haunui ki te whare pupuri taonga moana o Tāmaki Makaurau.
He rā whānau, ko te kaupapa ko ngā mahi whakatere waka.
Hei tā te Tohunga Whakatere Waka a Hoturoa Barclay-Kerr, "Kia arohanuitia te hunga taiohi ki tēnei kaupapa, ki ngā kōrero, ki ngā waiata, ki ngā mātauranga o tēnei mahi kia kore e memeha, kia kore e mate pērā i ērā atu o ngā kōrero kua ngaro ki te pō."
Nā Hoturoa Barclay-Kerr ōna wheako whakatere waka i hora ki te whakaminenga.
"Kia titiro rātau ki te kiriata nei hei hikoinga tuatahi ēngari ā muri ake me rapu rātau i ngā wāhi pēnei i tēnei o ngā whare taonga me ngā waka e noho mai kia kitea ā-kanohi rātau i ēnei waka."
I whakakao atu ngā toa whakataetae, ngā kaiwhakatakoto reo o te kiriata Moana me a rātau whānau. Kei te pīrangi a Hoturoa Barclay-Kerr kia rata atu ngā kaimātakitaki o te kiriata nei ki ngā mahi whakatere waka.
"Kia rongo rātau i ngā kōrero kua whakatere ēnei waka i te moana nui tae noa mai i tētahi taha ki tētahi taha o te moana nui ā Kiwa, kia rongo rātau ehara ēnei i te kōrero pakiwaitara anake ēngari he kōrero tūturu nō tō tātau iwi nō ō tātau tūpuna."
Hei tāna, he maha tonu ngā tāngata o te ao kāre e whakapono ana ki ngā mātauranga iwi taketake.
"Ka titiro rātau ki ēra ka kore rātau e whakamana i ngā mātauranga o aua iwi. Mā ēnei mahi ērā pūkenga ērā mātauranga ērā kōrero e whai mana i roto i te ao tūroa."
Hei āpōpō puta ai te kiriata Reo Māori o Moana.