E tata ana te kura o Manukura te whai taitara tuatahi ki te whakataetae poitūkohu kura tuarua ki Te Papaioea.
Ko te tau tuatahi kua uru rātou, ā, hei te pō nei tūtaki ai ki ngā whakaihuwaka, ki te kura tuarua o Opunake mō te whiringa toa.
Kua tae te wā, kua tahia te papa, he tino tukinga tēnei
Hei tā te kāpene o te kapa, hei tā Harata Coleman (Ngāti Porou), “Kei te āhua hīkaka me te āmaimai mātou nō te mea, ko te wā tuatahi kua uru mātou ki roto i tēnei whakataetae. He mea nui ki te tae ki ngā Whiringa Toa.”
Nā Tiatoa Temata-Frost, “Tino Poho Kererū mātou. He mea nui tēnei mō tēnei tīma.”
Ko te kura tuarua tērā o Opunake e tute ana i a rātou kia whiwhi ai he taitara tuatahi ki taua whakataetae.
Me āhua tūpato mātou ki a rātou nō te mea, ko rātou ngā Kaiwhakaihuwaka o tērā tau. He maha o rātou pūkenga, engari me ihu oneone mātou.
Kāore anō te hoariri kia hinga, ā, ko rātou hoki te kapa makau. Heoi, he toki anō kei te kapa o Manukura.
“Ko Tallen August nō te mea, ka mauria e ia te pōro. Ko Rochelle Fareen nō te mea he tino teitei ia, ā, ka tūrapa ia ki runga i ngā tāngata katoa,” nā Harata.
Nonapō nei ka puta te ihu o Manukura i te whiringa whāiti ki Te Aroha, e rima tekau mā whā ki te rima tekau mā iwa ngā tatau. Kua tino kite i ngā hua.
Nā Harata, “Ka ūpoko pakarū mātou i a rā, i a rā,
“Ko te wawata ka tāea tonu te whakakaha ake o rātou pūkenga, kia taēa te eke ki ngā taumata teitei,” hei tā Temata-Frost.
Pai tū, pai hinga, he mea whakahirahira ki te ao Māori te ekenga o Manukura ki te whiringa toa