I te rā tuarua o ngā whakataetae kapa haka ā rohe o Mātaatua i riro mā Te Whānau a Apanui hei wāhi i te huinga, ā, tau ana to rātou tū mai i ngā kanohi hōu me ngā pakeke o te kapa.
Ki tā Tamati Waaka kaitātaki Tāne mo Te Whānau a Apanui, “i te rā nei, e tama, i hiki te wairua e ō mātou tamariki, ko au te kaumātua o te kapa, tētahi, kei te tū au i te taha o toku tama i ēnei rangi, me kī rā me whakairi i taku piupiu, kua wherū, kua ngēngē, engari kua tutuki i ngā rangatahi.”
Ahakoa ko rātou te tuatahi, i takoto ai te manuka, e mōhio whānui ana koinei tētahi whakataetae uaua. Hei ko tā te tumu whakarae o Te Matatini a Carl Ross, “Kua kite ana i te mana, i te wehi, i te tapu o ngā tipuna, e waiho mai ki runga i te ātamira, puta mai ki a mātou, ā, ka mau te wehi.”
I te Matatini ka huri, e rua ngā rōpū nō Mātaatua i uru ki roto i Te Mātangirua. I tēnei rā, tekau mā waru ngā kapa kei te whai i ngā tūranga e rima. Ko tētahi o aua rōpū kei te whai i ērā tūnga, he kapa ā whānau, ko Ōhinemataroa ki Ruatāhuna.
Ko tā Ngatai Rangihau, kaitātaki tāne “me kī kua ea, ko tā mātou kaupapa he kawe mai i ngā mate o te kainga, ana, kua oti tēnā, kua tutuki, kei konei anō tētahi o ngā rōpū o Ruatāhuna mutu ana wērā, kua ea tērā take nui o te kainga, ngā parekure nui hoki o te kainga.” Hei te tau rua mano, rua tekau tū ai anō tēnei huinga ki raro i te mana o Te Whakatōhea.