Ko te whenua o te Kura Kōhine Māori o Turakina kua hokona e Te Rūnanga o Ngāti Apa - Ngā Wairiki hei kāinga mo ngā ratonga hauora o Rangitīkei. I kapi taua kura i te tau rua mano tekau ma rima na runga i ngā momo takanga pēnei i te pūtea me te tokoiti o ngā tauira.
E ai ki te Māngai o Te Rūnanga o Ngā Wairiki - Ngāti Apa, ki a Pahia Turia, "Kua koa a ngākau, te harikoa te kite ai i te menemene i runga i ngā kanohi o te nuinga i tae mai i tēnei rangi. Otinoa, he rangi tino whakahirahira tēnei mō tātou te iwi o Ngā Wairiki - Ngāti Apa."
Ko tā te Heamana o Te Tarahiti o Turakina Ngā Hara, ko tā Wayne Te Kaawa, "Mai rā anō kei a rātou te whenua. I raupatuhia te karauna i te whenua ko te tikanga o ta matou hahi, i riro whenua atu me hoki whenua mai."
Nōnā tata nei te kura i whakatairangahia ki te ipurangi mo te whā ira whitu miriona tāra. I whakapāhotia te whakapae ka whakatūria he whare ahuru mō te hunga manene ki te whenua.
E ai ki a Turia, "Ka tika me mihi ki te tarati o Turakina Ngā Hara mō tā rātou koha nui, tō rātou ngākau nui ki te iwi o Ngā Wairiki Ngāti Apa i roto i ngā kōrero kua kōrerohia nei ki waenga i a mātou."
I tūwhera tuatahi ai te kura i te tau kotahi mano iwa rau mā rima. I mua i ngā kōrero i waenga i te iwi me te tarahiti o Turakina Ngā Hara, i puta tētahi tono hei hoko i te kura i runga i te whakatau ka tangohia e rātou te whare karakia me ngā whakairo.
Ko tā Te Kaawa, Kāore mātou e whakaae ana ra ki tāna tono. Ko te tono rawe ki a mātou ko te tono o Ngāti Apa nā te mea ko ngā kaupapa ki roto i a rātou tono tuatahi ko te mana motuhake tuarua aroha tētahi ki tētahi.
E ai Te Rūnanga o Ngā Wairiki - Ngāti Apa ka tiakina e rātou te mauri o te kura, ā, ka noho tonu te whare karakia me ngā whakairo. Ka what wāhi anō hoki nga tauira me ngā kaimahi o mua ki konei.
Anō i a Te Kaawa, "Te whare karakia kei a rātou tērā, ko ngā poupou, kei a rātou, ko ngā taonga katoa, kei a rātou. I rongo ahau i o rātou tūmanako ka tū rātou he whare pupuri taonga mō ēnei taonga."
Inaianei ka whakahaeretia ngā take hēkeretari, me ngā ratonga hauora ā-iwi ki te kura. Ka mana te whakaaetanga hei te rangi tuaono o Paenga Whāwhā.