I whakamaumahara te pakanga ō mua ki waenga i a Tūhoe me Te Arawa a Pukekaikāhu ki roto i tētahi huinga motuhake ki Te Pakira Marae, Whakarewarewa, Rotorua. I whakawhitihia e ngā iwi ngā korero hītōri kei waenga i a rātou mai i tēnei kaupapa hītori nō te rau tau ki muri.
Neke atu i te kotahi rau, waru tekau tau mai i te pakanga o Pukekaikāhu. Hei tā Hori Uatuku o Tūhoe, koinei ngā uri o Te Purewa me Mokonuiarangi e kotahi nei ki te kōrero. “Kua puta ngā here, ngā herenga ki waenganui i a tātau, ahakoa na te pakanga tēnei here i timata, heoi anō ko te kua whaiwhai tātau i te tatau pounamu i whakarērea i hangai ki Ruatāhuna”.
Mo Te Arawa i aro atu a Wairangi Jones ki ngā hononga, “he aha ake te tikanga nei o Te Hōhou i te ronga, he mea e ora tonu nei tae noa ki tēnei hui, ā, i hōhou te rongo ā ka pūmau tonu nei i ngā iwi e rua nei, tae noa ki tēnei huihuinga o tātau”.
I tū te pakanga ki runga i ngā whenua pātata ki te roto o Rerewhakaitu, ki runga i ngā whenua kei raro i te rōpū kaitiaki o Onuku. “He tino tangata a Te Purewa, engari ko te mea nui nei ki a tātau o Te Arawa i hōhou i te rongo, ā, nā ngā me tētahi atu o ngā rangatira o Te Arawa waka a Mokonuiarangi, koinei te rangatira i noho ai ki te maunga o Ruawāhia, nā rāua i hōhou te rongo ki waenga i a Tūhoe me Te Arawa”, ki tā Jones.
Koinei te wā tuatahi kua tūhono mai a Tūhoe me Te Arawa ki runga i ngā korero mo Pukekaikāhu. Hei tā Uatuku, “kei te mihi ki Te Arawa, kei te mihi ki tēnei o a tātau hapū, mihi ake ki ngā tāngata e rika ki te wānanga i a tātau korero nei”. Whai muri i tēnei hui i takoto ai te tono a Tūhoe ki Te Arawa kia haere mai rātou ki Ruatāhuna ki Te Taumata o te Riu tētahi o ngā wāhi e hono ai ki te pakanga o Pukekaikāhu.