Āpōpō ka hoki atu te ahurei roa rawa o tēnei motu ki Rotorua. Koinei te tau wha tekau ma whitu o Te Hui Ahurei a Tuhoe a ko Rotorua te waahi i tīmata ai te ahurei. Ka whai waahi ngā uri o Tuhoe ki te whakakotahi hei whakapakari i to rātou tuakiri.
Kua rite te papa tū waewae o te Ahurei o Tūhoe, ā, ki tā Kimiora Webster a te iwa karaka i te ata o āpōpō ka rere te hui. “Ko te ōati o ngā kuia me ngā koroua ki runga i to tātau Marae i te wā e tamariki ana kia hoki mai te ahurei ki konei, ā, i wawatāhia, kua noho atu tērā hei moemoeā mo te hapū o Mātaatua ki Rotorua, inaianei, kua tae ki te wā”.
E matapaetia nei kei kō atu i te toru rau mano te utu mo te whakahaere i te ahurei ki tā ngā kaiwhakahaere i rere tēnei kaupapa nā runga i ngā utu whakauru, ngā rēhita mai i ngā kapa me ngā pūtea tautoko, heoi ko te hunga kaitūao, te hunga e akiaki ana i te kaupapa. Mo Te Aria Whauwhau kua hara mai ki te mahi i ngā mahi, “i moho pai au ki ngā kūrakuraku o tā mātou Ahurei, ngā nawe, ngā raru i te puta me te mea hoki ka kore tēnei Ahurei e ngāwari e māmā mo tātau te iwi o Tūhoe, heoi anō ko tāku he awhi. Ko te kapa haka, te hākinakina me te tautohe ngā mātāpono o te ahurei ka rere i roto i ngā rā e toru e tū mai nei.
Nō te tau whitu tekau mā tahi i tū ai te ahurei ki Rotorua. Ko te whakaara i te Tūhoetanga, te matemateaone tētahi ki tētahi ngā pūmanawa nui. Ko Te Arawa, te mana whenua ka tuku i te pōhiri ki a Tūhoe hei te whitu karaka i te ata ki Te Kaitao o Rangipare.