Mai iho, mai iho a Whanganui e whakaihuwaka ana i te whakataetae whutupōro Heartland Championship. Nō nanahi nei whakaatu anō rātou i tō rātou toa i Turanganui a Kiwa, i puta ngā ihu 53-0.
He marara te kite na te aha a Whanganui e angitu ake nei i te Heartland Competition. E waru ō rātou piro, kāore he paku aha ki te haukainga. Hei tā Campbell Hart, he mea kia noho piro-kore te hoariri, nā reira e poho kererū ana ia ki ngā mahi nui o tōna kapa. E harikoa anō ia i tutuki pai ai ngā nekehanga kua roa e whakangungu ana.
Mō Tamanui Hill, kāpene o Tūranganui a Kiwa, i whakaatu anō a Whanganui i tō rātou pakari, i āhei noa tōna kapa kia pērā.
I timata pai te haukainga a Tūranganui a Kiwa, heoi nā tētahi hapa noa e huri ai te tai. Hei tā Hart anō, ko te māhere mō tōna kapa kia aupiki ngā poumua, e tukuna ai ngā waewae parahuti kia oma.
Hoki atu hoki atu, ka whawhai a Tūranganui a Kiwa mō ia mita, kātahi ka riro i a Whanganui te pōro. Kāore e roa i muri ka piro. Heoi, kāore a Hart mō te kī atu he pērā rawa te māmā. E mihi anō ki te kaha o tō rātou mahi ārai, i āhei ai rātou kia koke whakamua.
I piki anō te kōunga o Tūranganui a Kiwa i te wehenga tuarua. Heoi, 36-0 te āputa, tē taea te pēhea. Ahakoa te haukerekeretanga e whakapono ana a Hill he akoranga kei roto mō tōna kapa.
Nā te wikitōria kaitā nei, kua eke a Whanganui ki te taumata tuatahi o te Heartland Championship, nā te tauwehe o ngā piro ki a King Country. Kua heke a Poverty Bay ki te tūranga 9 nā te hinga tuarua karapīpiti.
Kua hoki a Tūranganui a Kiwa, ki te papa-mā, whakarite ai mō te tukinga ki a West Coast ki Māwhera hei tērā wiki. Ka tākaro a Whanganui, kia Mid-Canterbury, tētahi kapa kei te keokeonga o te whakataetae.