He pātaka kōrero, he kaitito waiata a Kuini Moehau Reedy e pupuri ana i te mauri o te reo ake o tōna iwi o Ngāti Porou. I kōrero atu ia ki tō mātau karere ki a Te Kāea e pā ana ki te tito waiata i te ao hou.
Hei tā Kuini Moehau Reedy, “Ko te nuinga o ngā titonga e āhei ana ki te hau kāenga ko tō tātau mana whenua tonu kei te kōrero ngā wai ngā maunga ngā paripari kei te pākaranga i roto i ngā titonga waiata.
Ko tāna mahi he raranga i ngā kupu ake o Ngāti Porou ki āna titonga.
“E kuti hipi ana o tope rākau ana e mahi kaimoana ana kei reira tō e rere haere ana te wānanga hoki mai te tuari kai kei reira tonu e rere haere ana ngā kupu rā.”
Kua roa nei a ia e tito ana, e whakaako waiata ana ki ngā pīpī o te kōhanga reo tae atu ki ngā tauira kura tuarua. Ka mutu, he kaiako hoki ia mō te kapa o Hikurangi.
"Kī tonu ngākau i te aroha, i ngā kai i ahu mai i te whenua i te taiao."
Nō te tau 1941 whānau mai ia ko te wā o te pakanga tērā e haruru ana te marae i te waiata i te haka i te tangi.
Hei tā Kuini Moehau Reedy kei te mau tonu te tāhu o te whakaaro o te titonga i roto i ngā waiata me ngā haka.
“Hoki tonu atu ki a Māui, ahakoa e hia nei ngā titonga mō Māui ka taea tonu hoki atu ka kōrero tonu engari he rerekē te tirohanga atu ki ngā mahi a Māui i ēnei rā, he hiki anō te wairua o Māui ki roto i a tātau.”
Ka toro atu ia ki te taiao kia tō mai i te wairua o te takiwā hei whakakōrero i a ia.
Hei tā Moehau Reedy, “I hoki rā anō au ki Horoera kia kōrero ko te pāpaka kia kōrero ko te koura pāwharu arā ko te whenua e kōrero mai ana.
Ko tā Kuini Moehau Reedy he whakakipakipa i ngā whakatipuranga kia whakaputa i tō rātau katoa i roto i ngā momo waiata.