Ko Ngā Puna o Waiorea ngā toa whakaihu waka o Te Ahurea Tino Rangatiratanga mō tēnei tau. Ko tā ngā kaitātaki ō te kapa, ko ngā tuku whakahere mō te kapa he hua nui ka whakawhiwhi ki ā rāua.
E whakamānawa ake nei te kapa o Ngā Puna o Waiorea nā tō rātou ekenga ki te turanga tuatahi o te whakataetae Te Ahurea Tino Rangatiratanga. Ko te nihowera arā ko te kapa manāki i te kaupapa mō tēnei tau ko Te Kapunga i eke ki te kauhanga o te riri ahakoa tā rātou tuarua mai mā te āputa whāiti noa. I kapo Te Kura Māori o Ngā Tapuwae i te turanga tuatoru. Heoi ka mate kē ngā kapa ki te tatari ki tērā tau rā anō ki te tātāwhai urunga mō te whakataetae ā motu ki Vector Arena ki Tāmaki nei hei te tau rua mano rua tekau.
Ko tā te kaitātaki wahine o Ngā Puna o Waiorea a Atakura Hunia, "E tino hīkaka, e tino hari koa, kaore he kupu pea i tēnei wā. Inā te ataahua o tēnei whakataetae koina pea ngā kare ō roto, he tino WOW! Anei ko tāna anō mō te kotahi wiki anake i whakatā ai rātou i muri i te whakataetae ā motu i te Hurae i tēnei tau katahi i hoki atu rātou ki ngā whakawai, "Kapahaka i te ao kapahaka i te pō, kaore he aha ki ā māua."
Ko tā te kaitātaki tane o te kapa o Ngā Puna o Waiorea ā Te Kaha Jonathan mo te āmaimai i titia ki ā ia i te wā o te tohu whiwhinga, "I āhua pā mai tēra ahuatanga ki ahau, te āwangawanga ki waenga i ngā momo turanga engari i te mutunga o te rā i pai te tū, i pai tō rātou tū hoki nōreira e mihi ana ki ā rātou te mana whakahaere o tēnei o tēnei whakataetae."
Tuatahi - Ngā Puna o Waiorea
Tuarua - Te Kapunga
Tuatoru - Te Kura Māori o Ngā Tapuwae