Kotahi rau, whā tekau mano tāra ka whakawhiwhia ki a Ngahuia Mita hei taunaki i te rangahau tohu kairangi, e tiro atu ana ki ngā mahi whakatere waka hourua, hei toko ake i te ora. Ko tā Ngahuia Mita he huarahi anō tēnei e aro atu ai ki ngā tini take hauora ki Te Tairāwhiti.
Hei tā Ngahuia Mita, “He maha ngā take e pā ana ki te hauora ki konei ki Te Tairāwhiti nā reira ki au nei mā ngā waka ka taea ai e tātau te whai hauora”.
Koia ko tā Ngahuia Mita he mahi whakapakari i te tuakiri o te rangatahi Māori.
“Mēnā ka haramai ngā rangatahi ki te ako i ngā whakapapa kōrero e pā ana ki ngā waka ka taea e rātau te mōhio rātau ko wai rātau, nā reira he mea tino pai tērā mō te hauora”, te kī a Mita.
I tipu iho a Ngahuia he kaihoe. Ka tae ki Te Whare Wānanga o Ōtākou ki reira tiro atu ai ki ngā hononga hauora o te moana mō te tangata.
“Kei te mōhio tātau Ngāi Māori he tino pai ngā mahi waka engari i roto i te ao rangahau iti noa, nā reira ka taea e au te whakanui me te whakanuitia i te rangahau e pā ana ki te waka me te hauora”, te kī a Mita.
Ka ketuketu hoki a Ngahuia Mita i ngā kōrero tuku iho e pā ki ngā mahi whakatere waka ki Te Tairāwhiti, ā mohoā nei.
“Mēnā he iwi, he hapori anō e hiahia ana ki te mahi i tēnei mahi ki te hanga waka, ka taea e rātau te kite i ēnei rangahau”, te kī a Mita.
Ka kōkiritia ngā mahi i te maru o Tairāwhiti waka ki Tūranga Nui a Kiwa a te tau hou.