Kei te whatu a David Jones o Rongowhakaata i tētahi korowai hei tohu aroha mō tana tuahine a Erica i hinga i te tau kua hinga atu nei.
“Ko ngā āhuatanga katoa, ko ngā aho katoa he muka, he mea whiria i te harakeke, katohia te harakeke mai i konei mai i tēnei rori anō, ka mirimiria, ka miro, ka whakarite hei kākāhu”, te kī a David Jones.
Nō te tau kua taha ake nei kāwhakina atu ai a Erica Jones i te ringa o aituā. Nāna te tono ki tana tūngāne kia whatu i tētahi korowai mō tōna pōtaetaenga.
“Kāre i ako me pēhea te mahi kua waiho mā te wairua au e kawe i roto i tēnei o ngā mahi... Ka oho au i ētahi moemoeā, ka kite anō au i tēnei kākahu na reira i runga i te kite, me mahi te mahi”, te kī a David Jones.
I mahi a Erica Jones ki Te Papa Tongarewa, ko tana mahi he āta tuitui i te iwi, i ngā taonga anō hoki o Rongowhakaata ki te whare taonga.
Hei tā David Jones, “Kua tango i tēnei taonga o te harakeke, kua hurihia hei taonga whakamauhara ki te whakaaturanga o Rongowhakaata ka tahi, ka rua hei taonga whakamaumahara ki taku teina.”
He waiata whakamaumahara i puta i te kapa o Erica Jones ki Te Matatini arā, i a Whāngārā Mai Tawhiti.
“Ahakoa kua hinga ia, kua hinga taku teina, anō nei he maharatanga ki a ia. He karakia kei roto hei taonga mō te whānau, hei taonga mō te hapū, mō te iwi anō hoki”, te kī a Jones.
Kei te iri te korowai nei ki te whakaaturanga o Rongowhakaata ki Te Papa Tongarewa.