Hei āpōpō whakamānawatia ai te kotahi rau tau nō te hokinga mai o ngā hōia o Te Hokowhitu a Tū i te pakanga tuatahi o te ao. Kua whakaritea e Tākuta Monty Soutar tētahi ope whakahōnore, ā, ka takahi rangatū rātau i te ara hei tohu i te hīkoi i hīkoitia ai e ō rātau tīpuna i te hokitanga mai ki te wā kāinga.
He ako i te tū ā te hōia, te titiro a ngā kanohi, te mau pū, me te takahi a ngā waewae anō hoki.
Ko tā Tākuta Monty Soutar, “Ka hoki ngā whakaaro ki te ope o te Hokowhitu a Tū, tērā pea ka kitea i roto i tēnei rōpū te āhua o ō rātau koroua.”
Hei tā Eparima Soutar, “Ko tōku tipuna ko Rota Waipara, i te taha o tōku māmā, i haere ia i whawhai ki korā ā i hoki mai ia, ko tērā te take kei te mahi au i tēnei mahi.”
Ko tēnei te wā tuatahi e mau pū ai ētahi o ngā rangatahi nei, arā kia pērā tonu me o rātau tipuna koroua i haere ki te pakanga.
He whakamahara atu ki ngā hōia 300 i hoki mai ki te Hui Aroha i Tūranga, arā he hōia nō Ngāti Porou, nō ngā iwi ō Tūranga, nō Kahungunu, nō Te Whānau-a-Apanui, nō Tūwharetoa, nō Tūhoe, me ētahi o ngā iwi o Mātaatua.
“Ko te nuinga kua kutikuti i ngā makawe, ko wētahi kāre anō, engari kei te pai, mā mātau e kutikuti i tēnei rā. Rite te āhua... te nuinga he Māori engari wētahi he Pasifika, ko wētahi anō he Pākehā, ka pērā anō te ope Pionia”, te kī a Monty Soutar.
Āpōpō kawea atu ai ngā tohu Wikitōria a Te Moana Nui a Kiwa Ngārimu VC rāua ko Willie Apiata VC.
“Ko ngā Paionia, ngā Māori i haere ki te pakanga tuatahi, he pāpā koroua ki a Te Moana Nui a Kiwa Ngārimu, ka pērā anō a Willie nā reira he hononga ki tēnei kaupapa wērā tohu rīpeka wikitōria”, te kī a Monty Soutar.
Hei kīnaki atu ko te whakarewatanga ake o te pukapuka a Dr Monty Soutar arā ko 'Whītiki! Whiti! Whiti E! Ngā Māori i te pakanga tuatahi o te ao'.