Ko te wete hara i te poropiti o Tūhoe, i a Rua Kēnana e kātata mai ana i te puaretanga mai o te ara ki te iwi tūmatanui kia tuku kōrero mō Te Pire e Unuhia te Hara kai Runga i a Rua Kēnana.
Ko te Pire te urupare mō te mauherenga hē o Kēnana i te tau 1916, i te whakaekenga a ngā pirihimana mau pū e 70 ki Maungapōhatu ki te mauhere i a ia mō te hoko waipiro.
I reira, ko Kēnana, he tokowhitu atu anō hoki i mauherea, ā ko tāna tama, ko Toko, ko tōna whanaunga ko Te Maipi hoki i pūhia, ā mate tonu atu. I hāmanetia a Kenana mō te "papare i te matatika" o ngā pirihimana, ka whakawhiua kia tekau mā rua marama ki te mahi, kia tekau mā waru marama hoki e noho mauhere ana.
Tāpirihia...
[ Whakauru mai ]
ki te tāpiri ataata ki te rārangi ataata.
E ai ki Te Komiti Whāiti Take Māori, ko te whai a te Pire, he unu i ngā hara e here nei ki te āhua, ki te mana, ki te ingoa o Kēnana, ki āna uri anō hoki. Ka whai hoki kia hikina ake te mamae, te whakamā, te tauhae i whai atu i te whakaekenga ki Maungapōhatu.
Ko tā te mokopuna a Kēnana, ko tā Tāne Rua ki a Native Affairs, kua roa nei ngā tūkinotanga ki Maungapōhatu e mau ana ki Te Urewera, ki te hītori hoki o Tūhoe.
"He pai ake, ā kia whakatutuki atu e ora nei ēnei o ngā koroua, ngā pākeke, ngā tamariki, ngā mokopuna a te koroua nei."
E ai ki a Poipoi Te Kaawa o Ngā Toenga o Ngā Tamariki a Iharaira, “Ko ngā kōrero whakahāwea, whakaparahako i a ia, he rahi. Nā tōna iwi tonu, nā ōna tonu, nā ōna whānau, nā ōna hapū tonu ngā kōrero nei. Kei reira tonu tērā whakaaro e whakahāwea ana ki te āhua o tā mātou hari i te whakapono o Iharaira.”
Mā te Pire e mana ai te whakaaetanga ki waenga i te Karauna, i Ngā Toenga o Ngā Tamariki a Iharaira me Ngā Uri o Maungapōhatu Charitable Trust, kia ture te unu hara i i a Rua Kēnana, kia tuku whakapāha anō hoki.
Hei te 30 o Whiringa-a-Nuku kapi ai te wā tuku tono.
Tāpirihia...
[ Whakauru mai ]
ki te tāpiri ataata ki te rārangi ataata.